૨૫ વર્ષના એક યુવકે યુનાઇટેડ આરબ એમિરેટ્સમાં ટીચર તરીકેના પોતાના અનુભવ શૅર કર્યા હતા
અજબગજબ
પ્રતીકાત્મક તસવીર
દુબઈમાં એક પ્રાઇવેટ ટીચરને પોતાના સ્ટુડન્ટનું હોમવર્ક કરાવવા માટે ૨.૫ લાખ રૂપિયા ચૂકવવામાં આવ્યા હોવાની વાત બહાર આવી છે. ૨૫ વર્ષના એક યુવકે યુનાઇટેડ આરબ એમિરેટ્સમાં ટીચર તરીકેના પોતાના અનુભવ શૅર કર્યા હતા. આ યુવક એક ઇન્ટરનૅશનલ ટ્યુટરિંગ એજન્સી માટે કામ કરવા દુબઈ ગયો હતો. તેણે દુબઈના કેટલાક સૌથી ધનવાન પરિવારનાં બાળકોને ભણાવવાનું કામ કર્યું હતું. ટીચરે કહ્યું કે તેમના પરિવારનો સભ્ય હોય એ રીતે મારી સાથે સારો વ્યવહાર કરવામાં આવતો. જોકે આ ટીચરે ધનિક પરિવારનાં બાળકો કેવાં હોય એ વિશે જે અનુભવ શૅર કર્યા એ રસપ્રદ હતા. તેણે લખ્યું હતું કે આર્ટ અને ક્રાફ્ટના એક સેશન પછી જ્યારે મેં સ્ટુડન્ટને સફાઈ કરવા માટે જણાવ્યું ત્યારે તેણે કહ્યું કે તમને માત્ર ભણાવવાના પૈસા મળે છે, કચરો સાફ કરાવવાના નહીં; આ કામ માટે અમે નૅની રાખી છે તે સફાઈ કરશે. અન્ય એક સ્ટુડન્ટે હોમવર્ક કરાવવા માટે ટીચરને ૩૦૦૦ ડૉલર (આશરે ૨.૫ લાખ રૂપિયા) ચૂકવ્યા હતા.
બાળકોને કોચિંગ આપવાના મુદ્દે પેરન્ટ્સ વચ્ચે રીતસર વધુ પૈસા ચૂકવવા માટે હોડ જામતી એમ જણાવીને ટીચરે કહ્યું હતું કે ‘જે સમયે હું અન્ય ફૅમિલીના બાળકને ભણાવવા જતો એ જ સમયે પોતાના ઘરે આવવા માટે બીજી એક ફૅમિલીએ મને ત્રણથી ચાર ગણા વધારે પૈસા ઑફર કર્યા હતા. જ્યારે એક પરિવારે વર્ષના અંતે મને ૨૦,૦૦૦ ડૉલર (આશરે ૧૬.૭ લાખ રૂપિયા)ની ટિપ આપી હતી, તો એક રશિયન પરિવાર પ્રાઇવેટ યૉટમાં ઇટલીની ટૂર વખતે મને પણ સાથે લઈ ગયો હતો.’