તામિલનાડુમાં સ્થાનિક ચૂંટણીમાં સુપરસ્ટાર વિજયનો દબદબો

યુવા સુપરસ્ટાર થલાપતિ વિજયની ફૅન ક્લબને ૧૦૦થી વધુ બેઠકો મળી છે

થલાપતિ વિજય

તામિલનાડુમાં સ્થાનિક સ્વરાજ્યની ચૂંટણી યોજાઈ ગઈ. એમાં સુપરસ્ટાર કમલ હાસનના પક્ષને એક પણ બેઠક નથી મળી તો બીજી તરફ યુવા સુપરસ્ટાર થલાપતિ વિજયની ફૅન ક્લબને ૧૦૦થી વધુ બેઠકો મળી છે.

આમ તો વિજયે કોઈને તેના નામથી રાજકીય કારોબાર ચલાવવાની પરવાનગી નથી આપી અને એ માટે તેનાં પોતાનાં માતાપિતા વિરુદ્ધ કેસ દાખલ કર્યો છે, પણ તેણે પોતાની ફૅન ક્લબને ચૂંટણી લડવાની મંજૂરી આપી હતી. તામિલ સિનેમામાં લોકપ્રિયતામાં રજનીકાન્ત પછી બીજા નંબરે ગણાતા વિજયે પહેલી જ વાર કોઈ સંગઠનને પોતાના નામે ચૂંટણી લડવા દીધી છે. તામિલનાડુના નવ જિલ્લામાં ગ્રામ પંચાયતોની ચૂંટણીમાં ઑલ ઇન્ડિયા વિજય મક્કલ ઈય્યકમએ ઝંપલાવ્યું હતું અને 169માંથી 115 બેઠકો પર તેના ઉમેદવારોએ જીત હાંસલ કરી છે. એમાંય ૧૩ બેઠકો પર બિનહરીફ વિજેતા જાહેર થયા છે. ઉપરાંત વિજેતા ૧૧૫માંથી ૪૫ મહિલાઓ છે. અન્ય વિજેતાઓમાં ખેડૂતો, લૅબ ટેક્નિશ્યન, વિદ્યાર્થીઓ, સ્કૂલ શિક્ષક અને વેપારીઓ પણ છે. વિજયની ફૅન ક્લબમાં અત્યાર સુધી ૧૦ લાખથી વધારે રજિસ્ટર્ડ સભ્યો જોડાઈ ચૂક્યા છે.