એક ખૂબ જ જાણીતી હિન્દી ફિલ્મનો જાણીતો સંવાદ છે “મર્દ કો કભી દર્દ નહીં હોતા”, પુરુષોનું આવું જ ચિત્રણ કવિ નર્મદ પોતાની કવિતામાં કરતાં લખે છે “મર્દ તેહનું નામ, સમો આવ્યો કે ચાલે; કનક કામિની તજી, સજી રણમાં મ્હાલે.” પુરુષોની આ કઠણ અને કડક વલણ ધરાવતી છબી કાયમ રાખવામાં સમાજે દિલથી મહેનત કરી છે. લોકો એ વાતને તો સ્વીકારે છે કે પુરુષો નારિયેળ જેવા છે, પણ તેનાથી પણ ઓછા લોકો સમજી શકે છે કે આ નારિયેળની અંદર લાગણીઓની ભીનાશ યથાવત્ છે. આ જ્ઞાન ઠોકીને પુરુષોને મહાન ચિતરવાનો પ્રયાસ અમે કરતાં નથી, પણ તમામ મર્દ જે ‘દર્દ’ વેઠીને પણ સમાજમાં પરિવર્તન લાવવા માટે મથી રહ્યાં છે તેમની વાર્તા તમારા સુધી પહોંચાડવાના નમ્ર પ્રયાસરૂપે ગુજરાતી મિડ-ડે ડૉટ કૉમ લઈને આવ્યું છે એક વિશેષ સિરીઝ ‘મૅન્ટાસ્ટિક’. આ સિરીઝમાં આપણે દર પખવાડિયે મળીશું એવા પુરુષોને જેમણે તનતોડ મહેનત કરી કંઈક નવું ઉકાળ્યું હોય. તો આજે આપણે મળીશું ડૉ. નીતિન શાહને. તેઓ મૂળ તો ઍનેસ્થેસિયોલોજી અને ક્રિટિકલ કેર સાથે સંકળાયેલા છે. તેમણે પલ્સ ઓક્સિમેટ્રી, સેરેબ્રલ ઓક્સિમેટ્રી અને પ્રોસેસ્ડ ઇલેક્ટ્રોએન્સેફાલોગ્રામ (ઇઇજી)ના મોનિટરિંગના ક્ષેત્રમાં મહત્વપૂર્ણ રિસર્ચ કર્યું છે. તેઓ પોતાના વ્યસ્ત તબીબી વ્યવસાયની વચ્ચે અગણિત એનજીઓ સાથે મળીને સમાજસેવાનું પણ ભગીરથ કાર્ય પણ કરતા આવ્યા છે. છેલ્લાં ૩૦ વર્ષમાં તેઓએ ૧૮ દેશોમાં જઈને લોકોની મદદ કરી છે.
28 January, 2026 02:02 IST | Mumbai | Dharmik Parmar
