૧૧૦ની સ્પીડમાં રૉન્ગ સાઇડ પર બાઇક-સ્ટન્ટ કરતા યંગસ્ટરે જીવ ગુમાવ્યો

શુક્રવારે બનેલી આ ઘટનામાં મૃત્યુ પામનાર યુવકનો વિડિયો રેકૉર્ડ કરનાર ૧૯ વર્ષનો ગુજરાતી યુવક કુણાલ ઠક્કર ગંભીર રીતે જખમી થયો હતો

પ્રતીકાત્મક ફાઇલ તસવીર

૧૧૦ કિલોમીટરની સ્પીડમાં બાઇક ચલાવીને વિડિયો ઉતારવાના ચક્કરમાં મલાડમાં રહેતા ૨૧ વર્ષના પ્રિયેશ ભિંગારદીવેએ જીવ ગુમાવ્યો હતો. શુક્રવારે બનેલી આ ઘટનામાં મૃત્યુ પામનાર યુવકનો વિડિયો રેકૉર્ડ કરનાર ૧૯ વર્ષનો ગુજરાતી યુવક કુણાલ ઠક્કર ગંભીર રીતે જખમી થયો હતો. વેસ્ટર્ન સબર્બ્સમાં રહેતા ૬ ફ્રેન્ડ્સ ગુરુવારે મોડી રાતે બાઇક પર જૉય-રાઇડ માટે નીકળ્યા હતા ત્યારે પ્રિયેશ બોરીવલી-ઈસ્ટથી દહિસર તરફના બ્રિજ પર રૉન્ગ સાઇડમાં બાઇક દોડાવી રહ્યો હતો ત્યારે સામેથી આવતી કાર સાથે અથડાતાં તે બાઇક સાથે હવામાં ફંગોળાઈને રસ્તા પર પટકાતાં તેનું મૃત્યુ થયું હતું. MHB પોલીસ સ્ટેશને આકસ્મિક મૃત્યુનો કેસ નોંધીને તપાસ હાથ ધરી છે.

બોરીવલી, મલાડ અને મીરા રોડ રહેતા સ્કૂલના મિત્રો અર્જુન વાલા, પ્રિયેશ ભિંગારદીવે, કુણાલ ઠક્કર, દીપ મીરાણી, યશ ગોડા અને પ્રિયમ મેવાડા બુધવારે મહારાષ્ટ્ર ડેની રજા હોવાથી જમવા માટે સાંજે બાઇક પર બાંદરા ગયા હતા એમ જણાવતાં MHB પોલીસ સ્ટેશનના સિનિયર પોલીસ અધિકારીએ ‘મિડ-ડે’ને કહ્યું હતું કે ‘જમીને પાછા ફર્યા બાદ તેઓ દહિસરના પ્રમીલાનગર ખાતે બાઇક પર બેસીને ગપ્પાં મારી રહ્યા હતા ત્યારે રાતે અઢી વાગ્યે પ્રિયેશ સોહમની બાઇક લઈને ગયો હતો, પણ જ્યારે તે પાછો આવી રહ્યો હતો ત્યારે વિરુદ્ધ દિશામાં બાઇક ચલાવતો હતો. તેની બાઇકની સ્પીડ ૧૧૦ની હોવાથી બાઇકનું સંતુલન ગુમાવી દેતાં સામેથી આવતી કાર અને વિડિયો રેકૉર્ડ કરી રહેલા કુણાલ સાથે અથડાયો હતો. બન્નેને ભગવતી હૉસ્પિટલ લઈ જવાયા હતા, પણ પ્રિયેશને મૃત્યુ પામેલો જાહેર કર્યો હતો. કુણાલને પ્રાઇવેટ હૉસ્પિટલમાં ઍડ્‍મિટ કરવામાં આવ્યો છે.’