બુધવારે પણ ગરમીનો પારો ૩૭ ડિગ્રી સેલ્સિયસ રહ્યો, આજે યલો અલર્ટ
પ્રતીકાત્મક ફાઇલ તસવીર
શિયાળાની શરૂઆતની રાહ જોવાઈ રહી છે અને મુંબઈગરાઓને હજી સુધી ઠંડકનો અનુભવ થયો નથી અને ઑક્ટોબર હીટમાં શેકાઈ રહ્યા છે. બુધવારે પણ મુંબઈનું તાપમાન ૩૭ ડિગ્રી સેલ્સિયસની આસપાસ રહ્યું હતું અને આખું અઠવાડિયું આવી જ ગરમી રહેશે તથા ભેજવાળા વાતાવરણના કારણે વધુ બફારો સહન કરવો પડશે એવી આગાહી હવામાન ખાતાની છે. આજે મુંબઈ, થાણે અને પાલઘરમાં ગરમીની યલો અલર્ટ જાહેર કરવામાં આવી છે.
હવામાન ખાતાએ કરેલી આગાહી મુજબ આખું અઠવાડિયું શહેરનું તાપમાન ૩૫થી ૩૬ ડિગ્રી સેલ્સિયસની આસપાસ રહેશે. ગઈ કાલે વહેલી સવારના સમયે મુંબઈનું લઘુતમ તાપમાન ૨૯ ડિગ્રી સેલ્સિયસ રહ્યું હતું, જ્યારે બપોરના સમયે આ પારો વધીને ૩૭ ડિગ્રી સેલ્સિયસે પહોંચી ગયો હતો. ગયા અઠવાડિયે પણ મુંબઈનું મહત્તમ તાપમાન ૩૮.૨ ડિગ્રી સેલ્સિયસ જેટલું ઊંચું નોંધાયું હતું જેના પરથી શિયાળાની શરૂઆત થઈ ગઈ હોવા છતાં મુંબઈગરાઓને ગરમીથી જરાય રાહત મળી નથી.
હવાની ગુણવત્તા પણ ખરાબ, AQI પુઅર કૅટેગરીમાં
ADVERTISEMENT
ગરમી ઉપરાંત મુંબઈમાં હવાની ગુણવત્તા પણ બગડી છે. હવામાન ખાતાએ જાહેર કરેલા આંકડાઓ મુજબ શહેરનો ઍર ક્વૉલિટી ઇન્ડેક્સ (AQI) કથળ્યો છે. બુધવારે સવારે મુંબઈનો AQI ૧૯૨ નોંધાયો હતો જે પુઅર કૅટેગરીમાં આવે છે. છેલ્લા અમુક મહિનાઓમાં મુંબઈનો AQI હાલના AQIની સરખામણીમાં ઘણો જ સારો રહ્યો હતો. જોકે ચોમાસું પત્યું ત્યાર પછી હવાની ગુણવત્તાને પણ અસર થઈ છે.
