લંચ-બૉક્સમાં કાંદા-લસણની આઇટમો ન લાવવાનું કહેનારી સ્કૂલને હવે એજ્યુકેશન ડિપાર્ટમેન્ટની નોટિસ
સેવન સ્ક્વેર ઍકૅડેમી સ્કૂલ
પર્યુષણ નિમિત્તે સ્કૂલમાં લંચ-બૉક્સમાં કાંદા, લસણ, બીટ જેવાં કંદમૂળ ધરાવતો નાસ્તો ન આપવા સ્કૂલના પોર્ટલ પર અને વાલીઓના વૉટ્સઍપ પર મેસેજ કરનારી મીરા-ભાઈંદરના વિધાનસભ્ય નરેન્દ્ર મહેતાની સેવન સ્ક્વેર ઍકૅડેમી સ્કૂલને હવે એજ્યુકેશન ડિપાર્ટમેન્ટે નોટિસ મોકલી છે. આમ કરીને સ્કૂલ-મૅનેજમેન્ટે રાજ્ય-પ્રશાસનના નિયમોનું ઉલ્લંઘન કર્યું હોવાની ફરિયાદ મળ્યા બાદ જિલ્લા શિક્ષણ-અધિકારીએ સ્કૂલને આ સંદર્ભે નોટિસ મોકલી છે અને એનો જવાબ આપવા જણાવ્યું છે. લંચ-બૉક્સમાં કાંદા, લસણ ન લાવવાનો સર્ક્યુલર કયા આધારે કાઢવામાં આવ્યો, પ્રશાસનના નિયમોનો ભંગ થાય છે કે નહીં, આ બાબતે સ્કૂલનું વલણ શું છે એનો ખુલાસો એજ્યુકેશન ડિપાર્ટમેન્ટે માગ્યો છે. સ્કૂલ શું જવાબ આપે છે એ પછી એની સામે આગળની કાર્યવાહી કરવામાં આવશે એમ એજ્યુકેશન ડિપાર્ટમેન્ટે જણાવ્યું છે.
