સાકરની સંગ્રહખોરી ન થાય એ માટે રાજ્ય સરકાર સાબદી

ફૂડ ઍન્ડ સિવિલ સપ્લાય ડિપાર્ટમેન્ટે મિલો, વેપારીઓ, વિતરકો અને ઔદ્યોગિક ગ્રાહકો દ્વારા રાખવામાં આવેલા સ્ટૉકની ચકાસણી કરવા માટે આદેશ આપ્યો

પ્રતીકાત્મક તસવીર

સાકરના વધતા જતા ભાવને કન્ટ્રોલમાં રાખવા રાજ્ય સરકારે એનો સ્ટૉક કરવા માટે લિમિટ બાંધી છે અને સાથે જ વિદેશથી ૧૦ લાખ ટન કાચી સાકર ઇમ્પોર્ટ કરવાની પણ છૂટ આપી છે. એમ છતાં નિયમો ચાતરી, સાકરનો સ્ટૉક કરી, કૃત્રિમ અછત ઊભી કરી, ભાવ વધારીને લેવાના પ્રયાસ થતા રહે છે. એના પર અંકુશ મૂકવા હવે રાજ્ય સરકારના ફૂડ ઍન્ડ સિવિલ સપ્લાય ડિપાર્ટમેન્ટે મિલો, વેપારીઓ, વિતરકો અને ઔદ્યોગિક ગ્રાહકો દ્વારા રાખવામાં આવેલા સ્ટૉકની ચકાસણી માટે આદેશ આપ્યો છે અને એની ચકાસણી ચાલુ કરી છે. ગોડાઉનમાં ફિઝિકલ ચેકિંગ કરવા માટે જિલ્લાસ્તરે ખાસ નિરીક્ષણ-ટીમોની રચના કરવામાં આવી છે. મુંબઈ અને થાણે વિભાગોમાં ખાસ ટીમો સંબંધિત રૅશનિંગ કન્ટ્રોલર્સ હેઠળ કાર્ય કરશે.

કેન્દ્ર સરકારના નિર્દેશોને અનુસરીને લાગુ કરાયેલા આ પ્રતિબંધો ૩૦ નવેમ્બર સુધી અમલમાં રહેશે. કેન્દ્રીય ધોરણો હેઠળ સરકારી એજન્સીઓ સિવાયના વેપારીઓ અને ડિસ્ટ્રિબ્યુટર્સ સાકર કલેક્ટ કર્યાની તારીખથી ૩૦ દિવસથી વધુ સમય સુધી સ્ટૉક રાખી શકતા નથી. તેમને કોઈ પણ સમયે ૪૦૦૦ ક્વિન્ટલથી વધુ સાકર રાખવાની પણ મનાઈ છે.

ADVERTISEMENT

રાજ્યના નિર્દેશ અનુસાર વેપારીઓ અને ડિસ્ટ્રિબ્યુટરોએ સરકારી પોર્ટલ પર નોંધણી કરાવવી પડશે. સ્ટૉક છુપાવવા અથવા ખોટી માહિતી સબમિટ કરવા પર આવશ્યક ચીજવસ્તુ અધિનિયમ 1955 હેઠળ કડક કાર્યવાહી કરવામાં આવશે જેમાં ફોજદારી કાર્યવાહીનો સમાવેશ થાય છે.