પોલીસે મારું કોઈ નિવેદન પણ નથી નોંધ્યું કે નથી કોઈ દસ્તાવેજો આપ્યા
મુંબઈમાં થયેલા આંદોલન વખતે ઇમરાન ખાનની અટક કરવામાં આવી એ વખતની તસવીર.
અમેરિકન નાગરિક હોવા છતાં નિયમોની વિરુદ્ધ જઈને આંદોલનમાં ભાગ લેનારા બૉલીવુડના ઍક્ટર ઇમરાન ખાને મુંબઈ પોલીસે હજી સુધી તેનું નિવેદન નોંધ્યું ન હોવાનો દાવો કર્યો છે. આ ઉપરાંત અમેરિકા પાછા મોકલવાની કાર્યવાહી કયા આધારે કરવામાં આવી એ વિશેના દસ્તાવેજો પણ પોતાને પૂરા પાડવામાં આવ્યા ન હોવાનું ઇમરાન ખાનનું કહેવું છે.
ઇમરાન ખાને ફૉરેનર્સ રીજનલ રજિસ્ટ્રેશન ઑફિસ (FRRO)ને લખેલા પત્રમાં જણાવ્યું હતું કે ‘પોલીસે જે દસ્તાવેજોના આધારે શો-કૉઝ નોટિસ મોકલીને મને ઓવરસીઝ ઇન્ડિયન સિટિઝનશિપ (OCI) રદ કરવાની માગણી કરી છે એનાથી સંબંધિત એક પણ દસ્તાવેજ મને મોકલવામાં આવ્યો નથી. મને ૧૭ ઑક્ટોબરે નોટિસ મોકલીને જવાબ આપવા માટે ફક્ત ૧૫ દિવસનો એટલે કે પહેલી નવેમ્બર સુધીનો સમય આપવામાં આવ્યો હતો.’
ADVERTISEMENT
ઇમરાન ખાને માગણી કરી છે કે તેને બધા જ દસ્તાવેજો પૂરા પાડવામાં આવે જેથી તે એને ચકાસીને શો-કૉઝ નોટિસનો જવાબ આપી શકે. ઇમરાનનો દાવો છે કે FRROએ મુંબઈ પોલીસે રજૂ કરેલી નોટિસના આધારે OCI રદ કરવાની કાર્યવાહી શરૂ કરી છે, પરંતુ મુંબઈ પોલીસ દ્વારા આપવામાં આવેલો રિપોર્ટ અધૂરો છે અને એમાં તેનું નિવેદન જ નથી નોંધવામાં આવ્યું.
