મુંબઈના રસ્તાઓ પર ક્ષણભર માટે આંધળા કરી દેતી હેડલાઇટ્સના આતંક સામે RTO સાવ નિષ્ક્રિય

બોરીવલી RTOમાં એક વર્ષમાં માત્ર ૮૪ વ્હીકલને ફાઇન થયો, મુંબઈ સેન્ટ્રલ RTOમાં ૮૮ કેસનો નિકાલ

પ્રતીકાત્મક તસવીર

મુંબઈના રસ્તા પર રાતે વાહનોમાં વપરાતી ગેરકાયદે અને અતિશય બ્રાઇટ હેડલાઇટ્સ બીજા ડ્રાઇવરો માટે જોખમી બની રહી છે. નિયમોની સ્પષ્ટતા હોવા છતાં ટ્રાફિક-પોલીસ દ્વારા આવી હેડલાઇટ્સ લગાવનારા લોકો સામેની કાર્યવાહી સુસ્ત જણાતાં સામાન્ય જનતામાં રોષ જોવા મળી રહ્યો છે. હેડલાઇટ્સના નિયમભંગ બદલ બોરીવલી RTOમાં એક વર્ષમાં માત્ર ૮૪ વ્હીકલને દંડ ફટકારવામાં આવ્યો છે.

એપ્રિલ ૨૦૨૫થી માર્ચ ૨૦૨૬ દરમ્યાન બોરીવલીની રીજનલ ટ્રાન્સપોર્ટ ઑફિસ (RTO)એ ૨૫૨ વ્હીકલની તપાસ કરીને ૮૪ વ્હીકલને દંડ ફટકાર્યો છે. દંડપેટે ૭૭,૦૦૦ રૂપિયા વસૂલ કરવામાં આવ્યા છે. થાણે RTOએ ૪૦૬ ચલાન ઇશ્યુ કરીને ૨.૧૯ લાખ રૂપિયા વસૂલ કર્યા છે. મુંબઈ સેન્ટ્રલ RTOએ ૧૬૯ કેસ નોંધ્યા છે અને ૮૮નો નિકાલ કરીને ૪૪,૦૦૦ રૂપિયા વસૂલ કર્યા છે. 

ADVERTISEMENT

અકસ્માતનું જોખમ

મુંબઈમાં વાહનોમાં કંપની-ફિટિંગને બદલે આફ્ટર-માર્કેટ લાઇટ્સ લગાવવાનું પ્રમાણ વધ્યું છે. સેન્ટ્રલ મોટર વ્હીકલ રૂલ્સ (CMVR) મુજબ હેડલાઇટની બ્રાઇટનેસ અને એનો ઍન્ગલ નક્કી હોય છે, પરંતુ શોખ માટે ડ્રાઇવરો LED અથવા હાઈ ઇન્ટેન્સિટી ડિસ્ચાર્જ (HID) લાઇટ લગાવી રહ્યા છે. આ લાઇટ એટલી તેજ હોય છે કે એ સામેથી આવતા ડ્રાઇવરના વિઝનને થોડી સેકન્ડો માટે બ્લાઇન્ડ કરી દે છે, જેને પગલે જીવલેણ અકસ્માતનું જોખમ રહે છે.