સ્કૅમમાં સામેલ હતા એવા પંચાવન વિવાદિત અધિકારીઓનાં નામ નવા રૂટીન ટ્રાન્સફર-લિસ્ટમાં
બીએમસી હેડક્વૉર્ટર
ગયા વર્ષે ચકચાર જગાવનારા ‘કૅશ ફૉર પોસ્ટિંગ’ સ્કૅમમાં BMCના ૧૬૧ અધિકારીઓનાં નામ આવ્યાં હતાં. હવે ફરીથી નવા રૂટીન ટ્રાન્સફર-લિસ્ટમાં એમાંના પંચાવન અધિકારીઓનાં નામ આવ્યાં હોવાનો ખુલાસો ભારતીય જનતા પાર્ટી (BJP)ના વિધાનસભ્ય મિહિર કોટેચાએ કર્યો છે અને BMCના કમિશનર અશ્વિની ભિડેને આ અંગે યોગ્ય પગલાં લે એવી વિનંતી કરી છે. હજી સુધી રૂટીન ટ્રાન્સફર લિસ્ટને અંતિમ મંજૂરી મળી ન હોવાથી પગલાં લેવાં શક્ય હોવાથી મિહિર કોટેચાએ આ વિનંતી કરી છે.
મિહિર કોટેચાનું કહેવું છે કે રદ કરવામાં આવેલા લિસ્ટમાં ૧૬૧ અધિકારીઓનાં નામ હતાં, તેઓમાંના પંચાવન અધિકારીઓને પહેલાં જે પોસ્ટિંગ આપવામાં આવી હતી એ જ પોસ્ટિંગ નવા રૂટીન ટ્રાન્સફર લિસ્ટમાં પણ આપવામાં આવી છે.
ADVERTISEMENT
સિનિયર અધિકારીઓએ પાંચથી ૪૦ લાખ રૂપિયા માગ્યા હોવાનો આરોપ હતો
ગયા વર્ષે ઑક્ટોબરમાં મનગમતી પોસ્ટિંગ મેળવવા તેમ જ પ્રમોશન મેળવવા માટે BMCના સિનિયર અધિકારીઓએ પાંચ લાખથી ૪૦ લાખ રૂપિયાની માગણી કરી હોવાની ચર્ચા જાગી હતી અને કથિત ‘કૅશ ફૉર પોસ્ટિંગ’ સ્કૅમ સામે આવ્યું હતું. લાંચ આપીને ટ્રાન્સફર-પોસ્ટિંગ અને પ્રમોશન મેળવાયું હોવાના આરોપ થતાં તત્કાલીન BMCના કમિશનર ભૂષણ ગગરાણીએ ગેરરીતિને ધ્યાનમાં રાખી ટ્રાન્સફરના આદેશ પર રોક લગાવી હતી અને પછીથી મુખ્ય પ્રધાન દેવેન્દ્ર ફડણવીસે ટ્રાન્સફર્સ-પોસ્ટિંગ્સ રદ કરી દીધી હતી.
