આ જહાજ ગયા વર્ષે ૨૪ જૂને નેવલ સ્ટેશન નોર્ફોકથી યુરોપ જવા માટે રવાના થયું હતું
તસવીર સૌજન્યઃ એપી
વિશ્વનું સૌથી મોટું વિમાનવાહક જહાજ USS ગેરાલ્ડ R ફોર્ડ ૩૦૯ દિવસની રેકૉર્ડબ્રેક જમાવટ પછી મિડલ ઈસ્ટ છોડવાની તૈયારી કરી રહ્યું છે જે કોઈ પણ આધુનિક અમેરિકન યુદ્ધજહાજે દરિયામાં સતત વિતાવેલા સૌથી લાંબા સમય સુધી રહ્યું છે. ગેરાલ્ડ ફોર્ડ મે મહિનાના મધ્યમાં વર્જિનિયાના નેવલ સ્ટેશન નોર્ફોકના એના હોમ-બંદર પર પાછું ફરે એવી અપેક્ષા છે.
આ મુદ્દે અધિકારીઓએ જણાવ્યું હતું કે ‘આ જહાજે ઈરાન સામેના યુદ્ધ અને વેનેઝુએલાના પ્રેસિડન્ટ નિકોલસ માદુરોની ધરપકડમાં ભાગ લીધો હતો. મિડલ ઈસ્ટમાં બે અમેરિકન યુદ્ધજહાજો USS અબ્રાહમ લિન્કન અને USS જ્યૉર્જ એચ. ડબલ્યુ. કાર્યરત છે જે ઈરાની બંદરો પર અમેરિકાની નાકાબંધીને અમલમાં મૂકવા માટે અરબી સમુદ્રમાં કાર્યરત છે.’
ADVERTISEMENT
ગેરાલ્ડ ફોર્ડ કઠોર સમયમાંથી પસાર થઈ રહ્યું છે. જહાજ વારંવાર યાંત્રિક સમસ્યાઓ અને ઘસારાનો અનુભવ કરી રહ્યું છે જેને બંદરે પાછું ફર્યા પછી વ્યાપક સમારકામ અને જાળવણીની જરૂર પડશે. અગાઉ લૉન્ડ્રી રૂમમાં લાગેલી આગથી એને નુકસાન થયું હતું અને કેટલાક ખલાસીઓ ઘાયલ થયા હતા.
આ જહાજ ગયા વર્ષે ૨૪ જૂને નેવલ સ્ટેશન નોર્ફોકથી યુરોપ જવા માટે રવાના થયું હતું. ત્યાર બાદ ટ્રમ્પ પ્રશાસને એને ઍટલાન્ટિક પાર કરીને કૅરિબિયન જવાનો નિર્દેશ આપ્યો હતો. ત્યાં એણે વેનેઝુએલાના તેલનિકાસ પર અમેરિકાની નાકાબંધી અને જાન્યુઆરીમાં પ્રેસિડન્ટ નિકોલસ માદુરોની ધરપકડમાં મદદ કરી હતી. સામાન્ય રીતે જહાજોને એના મેઇન્ટેનન્સના સમયપત્રકને જાળવી રાખવા માટે ૬ કે ૭ મહિના માટે દરિયામાં તહેનાત કરવામાં આવે છે. જોકે ગેરાલ્ડ R ફોર્ડ ૧૦ મહિનાથી વધુ સમયથી તહેનાત છે.
