Trump Tariffs News: અમેરિકાના મેનહટનમાં એક ફેડરલ કોર્ટે ટ્રમ્પ વહીવટીતંત્ર દ્વારા લાદવામાં આવેલા લિબરેશન ડે ટેરિફ પર પ્રતિબંધ મૂક્યો છે અને તેને ગેરકાયદેસર ગણાવ્યો છે
ડોનલ્ડ ટ્રમ્પ (ફાઇલ તસવીર)
અમેરિકા (United States of America)ના રાષ્ટ્રપતિ ડોનાલ્ડ ટ્રમ્પ (Donald Trump)ને કોર્ટ તરફથી મોટો ઝટકો લાગ્યો છે. અમેરિકાના મેનહટન (Manhattan)માં એક ફેડરલ કોર્ટે ટ્રમ્પ દ્વારા લાદવામાં આવેલા `લિબરેશન ડે` ટેરિફ (Liberation Day tariffs) પર પ્રતિબંધ મૂક્યો છે.
અમેરિકાના મેનહટનમાં એક ફેડરલ કોર્ટે પોતાનો ચુકાદો આપતી વખતે કહ્યું કે, રાષ્ટ્રપતિએ પોતાની સત્તાનો દુરુપયોગ કર્યો છે અને યુએસ બંધારણ વિરુદ્ધ પગલાં લીધાં છે. જોકે, ટ્રમ્પ વહીવટીતંત્રે રાષ્ટ્રપતિ દ્વારા લેવામાં આવેલા નિર્ણયનો બચાવ કરવાનો પ્રયાસ કર્યો અને ટેરિફ (Trump Tariffs News) જાળવી રાખવાનો આગ્રહ કર્યો.
ADVERTISEMENT
ટ્રમ્પ વહીવટીતંત્રે કોર્ટમાં દલીલ કરી હતી કે, આ કેસમાં કાનૂની પછડાટ ચીન સાથેના અસમાન વેપાર સંઘર્ષનો માર્ગ બદલી શકે છે અને ભારત અને પાકિસ્તાન વચ્ચે તાજેતરમાં થયેલા યુદ્ધવિરામનો અંત લાવી શકે છે.
ટ્રમ્પ વહીવટીતંત્રે દાવો કર્યો હતો કે, રાષ્ટ્રપતિએ મે મહિનાની શરૂઆતમાં ભારત અને પાકિસ્તાન વચ્ચે યુદ્ધવિરામ (India-Pakistan Ceasefire) કરાવવા માટે તેમની ટેરિફ શક્તિનો ઉપયોગ કર્યો હતો. ટ્રમ્પ વહીવટીતંત્રના અધિકારીઓએ કોર્ટને જણાવ્યું હતું કે, ટેરિફ અંગે ઘણા દેશો સાથે વેપાર વાટાઘાટો ચાલી રહી છે અને વેપાર સોદાઓને અંતિમ સ્વરૂપ આપવાની અંતિમ તારીખ ૭ જુલાઈ છે.
જોકે, કોર્ટે ડોનાલ્ડ ટ્રમ્પ વહીવટીતંત્ર દ્વારા રજૂ કરાયેલી દલીલોને ફગાવી દીધી હતી અને કોર્ટ ઓફ ઇન્ટરનેશનલ ટ્રેડ (Court of International Trade)ની ત્રણ ન્યાયાધીશોની બેન્ચે કહ્યું હતું કે, યુએસ બંધારણ મુજબ, વિદેશી દેશો સાથે વેપારનું નિયમન કરવાનો અધિકાર ફક્ત યુએસ કોંગ્રેસ એટલે કે સંસદ પાસે છે, રાષ્ટ્રપતિ પાસે નહીં. કોર્ટે એ પણ સ્પષ્ટ કર્યું કે, આ મામલો રાષ્ટ્રપતિની કટોકટી સત્તા હેઠળ આવતો નથી. કોર્ટે કહ્યું કે, કાયદો ટ્રમ્પને ઇન્ટરનેશનલ ઇમરજન્સી ઇકોનોમિક પાવર્સ એક્ટ (International Emergency Economic Powers Act - IEEPA) હેઠળ ટેરિફ લાદવાની અમર્યાદિત સત્તા આપતો નથી.
ટ્રમ્પ ટેરિફ શું છે?
- યુએસ કમાન્ડર-ઇન-ચીફે ૨ એપ્રિલના રોજ અમેરિકાના મોટાભાગના વેપાર ભાગીદારો પર ટેરિફની જાહેરાત કરી, જેનો આધાર ૧૦ ટકા હતો.
- ઉચ્ચ દર એવા દેશો પર લાગુ થયા જેમની સાથે યુએસનો સૌથી વધુ વેપાર ખાધ છે, ખાસ કરીને ચીન અને યુરોપિયન યુનિયન.
- આમાંના ઘણા દેશો પર ટેરિફ એક અઠવાડિયા પછી બંધ કરી દેવામાં આવ્યા હતા.
- ટેરિફ રોકવા પાછળનું કારણ એ છે કે અમેરિકન ઉત્પાદન ક્ષમતાને પુનઃસ્થાપિત કરવાના હેતુથી આ ટેરિફથી યુએસ શેરબજારમાં ગભરાટ ફેલાયો હતો.
ટ્રમ્પ વહીવટીતંત્રના નિર્ણયને કોણે પડકાર્યો?
- એક કેસ નાના વેપારીઓના જૂથ દ્વારા દાખલ કરવામાં આવ્યો હતો.
- બીજો કેસ ૧૨ ડેમોક્રેટિક એટર્ની જનરલો દ્વારા દાખલ કરવામાં આવ્યો હતો.
- તેમણે કહ્યું કે ટ્રમ્પે જે કાયદાનો ઉપયોગ કર્યો હતો તે IEEPA તેમને વિશ્વભરમાં એક સાથે ટેરિફ લાદવાનો અધિકાર આપતો નથી.
- તેમના વકીલે દલીલ કરી હતી કે ટ્રમ્પની કથિત કટોકટી ફક્ત તેમની કલ્પના છે. વેપાર ખાધ દાયકાઓથી ચાલી રહી છે પરંતુ તેનાથી કોઈ કટોકટી ઊભી થઈ નથી.
ટ્રમ્પ વહીવટીતંત્રની શું દલીલ હતો?
- ૧૯૭૧માં, તત્કાલીન રાષ્ટ્રપતિ રિચાર્ડ નિક્સને પણ કટોકટી હેઠળ ટેરિફ લાદ્યા હતા અને કોર્ટે તેને મંજૂરી આપી હતી.
- રાષ્ટ્રપતિ દ્વારા કટોકટી જાહેર કરવાની માન્યતા નક્કી કરવાનો અધિકાર કોંગ્રેસનો છે, કોર્ટનો નહીં.
- કોર્ટે ટ્રમ્પ વહીવટીતંત્ર દ્વારા આપવામાં આવેલી દલીલોને ફગાવી દીધી.
ન્યાયાધીશોએ તેમના આદેશમાં શું લખ્યું?
- રાષ્ટ્રપતિનો ટેરિફ લાદવાનો દાવો, જેની કોઈ સમય કે અવકાશ મર્યાદા નથી, તે કાયદા હેઠળ આપવામાં આવેલી સત્તાની બહાર છે.
- આ ટેરિફ ગેરકાયદેસર છે. યુએસ બંધારણ મુજબ, ટેરિફ લાદવાની સત્તા સંસદ એટલે કે કોંગ્રેસ પાસે છે, રાષ્ટ્રપતિ પાસે નહીં.
- રાષ્ટ્રપતિને ફક્ત અસાધારણ કટોકટીમાં જ મર્યાદિત સત્તાઓ મળે છે, પરંતુ ટ્રમ્પના કિસ્સામાં આવી કોઈ કાયદેસર કટોકટી નહોતી.
હવે આગળ શું?
- જોકે, ટ્રમ્પ વહીવટીતંત્ર હવે ફેડરલ સર્કિટ માટે યુએસ કોર્ટ ઓફ અપીલ્સમાં નિર્ણયને પડકારી શકે છે અને પછી સુપ્રીમ કોર્ટમાં જઈ શકે છે.
- આ પહેલી વાર છે જ્યારે કોઈ ફેડરલ કોર્ટે ટ્રમ્પના ટેરિફને ગેરકાયદેસર ગણાવ્યા છે.
