સિવિલ હૉસ્પિટલના કૅમ્પસમાં ૬૦ કરોડ રૂપિયાના ખર્ચે ૮૫૮ બેડની ક્ષમતા સાથે રેનબસેરા બનાવ્યું છે
અમદાવાદની સિવિલ હૉસ્પિટલમાં બનેલું રેનબસેરા
એશિયાની સૌથી મોટી અમદાવાદની સિવિલ હૉસ્પિટલમાં ગુજરાત ઉપરાંત અન્ય રાજ્યોમાંથી પણ દરદીઓ સારવાર માટે આવે છે. બહારગામ કે બીજાં રાજ્યોમાંથી આવતા ગરીબ અને મધ્યમ વર્ગના દરદીઓની સારવાર દરમ્યાન તેમનાં સગાંઓને રહેવા માટે ગુજરાત સરકાર દ્વારા સિવિલ હૉસ્પિટલના કૅમ્પસમાં ૮૫૮ બેડની ક્ષમતા સાથે રેનબસેરા બનાવવામાં આવ્યું છે.
સિવિલ હૉસ્પિટલમાં દર વર્ષે અંદાજે એક લાખ જેટલા દરદીઓ ઇન્ડોર પેશન્ટ તરીકે સારવાર માટે દાખલ થાય છે. બહારથી આવતા દરદીઓનાં સગાંઓને રહેવા માટે પડતી હાલાકીને દૂર કરવા માટે સિવિલ હૉસ્પિટલના કૅમ્પસમાં ૬૦ કરોડ રૂપિયાના ખર્ચે ૮૫૮ બેડની ક્ષમતા સાથે રેનબસેરા બનાવ્યું છે. એમાં ડૉર્મિટરીમાં સામાન રાખવા માટે લૉકરની સુવિધા ઉપલબ્ધ છે. બેઝમેન્ટ સાથે ૮ ફ્લોરના આ બિલ્ડિંગમાં ગ્રાઉન્ડ ફ્લોર પર રિસેપ્શન, ૨૮૦ લોકોની ક્ષમતા ધરાવતી કૅન્ટીન, ATM તેમ જ દૈનિક જરૂરિયાતની ચીજવસ્તુઓ મળી રહે એ માટે ૮ દુકાન બનાવી છે. બેઝમેન્ટમાં ૫૮ કાર અને ૯૧ ટૂ-વ્હીલર માટે પાર્કિંગની સુવિધા કરવામાં આવી છે. આ સુવિધાથી ગરીબ અને મધ્યમ વર્ગના પરિવારોને સુરિક્ષત અને સન્માનજનક રહેઠાણ મળશે. જોકે આ રેનબસેરામાં કેટલું ભાડું હશે એ હજી નક્કી થયું નથી.
