આ દાદાએ ૯૫ વર્ષે સ્કીઇંગ કરીને બનાવ્યો રેકૉર્ડ
કૅનેડાના ઑન્ટારિયોમાં રહેતા ગૉર્ડન પ્રેશિયસ
કૅનેડાના ઑન્ટારિયોમાં રહેતા ગૉર્ડન પ્રેશિયસ નામના દાદાએ વિશ્વના સૌથી મોટી વયના હેલી-સ્કીઅર તરીકેનો ગિનેસ વર્લ્ડ રેકૉર્ડ બનાવીને ઍડ્વાન્સમાં પોતાનો ૯૫મો જન્મદિવસ મનાવ્યો હતો.
ગૉર્ડનદાદાએ જ્યારે બ્રિટિશ કોલમ્બિયાના કેરીબો પર્વત પર હેલી-સ્કીઇંગ કર્યું ત્યારે તેમની ઉંમર ૯૪ વર્ષ અને ૩૦૬ દિવસની હતી. હેલી-સ્કીઇંગમાં પર્વતની દુર્ગમ ચોટી પર હેલિકૉપ્ટર દ્વારા પહોંચવાનું હોય છે અને પછી ત્યાંથી નીચેની તરફ સ્કીઇંગ કરીને ઊતરવાનું હોય છે. ગૉર્ડન પ્રેશિયસને તેમની માર્ગદર્શિકા હેલિકોપ્ટર દ્વારા ‘અમૃત’ સ્કી-રનની ટોચ પર લઈ ગઈ હતી અને ત્યાર બાદ પર્વત પરથી સ્કીઇંગ કરીને તેઓ નીચે આવ્યા હતા.
છેલ્લાં પાંચ વર્ષમાં હેલિકૉપ્ટર દ્વારા મારું એ પ્રથમ સાહસ હતું એમ જણાવતાં આ દાદાએ કહ્યું કે જ્યારે હેલિકૉપ્ટર શરૂ થયું ત્યારે હું વિચારતો હતો કે આ કેવી રીતે થશે, પરંતુ પછી મને મારી સાથે એક અનુભવી માર્ગદર્શિકા હોવાનું યાદ આવ્યું જે સતત મારી સાથે જ હતી. તેમના પહેલાનો ઓલ્ડેસ્ટ સ્કીઅરનો રેકૉર્ડ ૯૧ વર્ષના સાહસિકના નામે હતો, જે હવે ગૉર્ડન પ્રેશિયસના નામે આવી ગયો છે.
