સુરેશ દલાલની કેટલીક પંક્તિઓ
ADVERTISEMENT
રાધાનું નામ તમે વાંસળીના સૂર મહીં
વ્હેતું ના મેલો, ઘનશ્યામ!
સાંજ ને સવાર નિત નિંદા કરે છે
ઘેલું ઘેલું રે ગોકળિયું ગામ!
* * *
લીલ લપાઈ બેઠી જળને તળિયે;
સૂર્યકિરણને એમ થયું કે લાવ જઈએ મળિયે!
* * *
મને ઘૂઘવતા જળે ખડકનું પ્રભુ! મૌન દો!
* * *
તમારું અર્પેલું સ્મિત લઈ હવે ક્યાંક સરતો
તરાપો ડૂબેલો કમળ થઈને આજ તરતો
* * *
રાત-દિવસનો રસ્તો વ્હાલમ નહીં તો ખૂટે કેમ?
તમે પ્રેમની વાતો કરજો : અમે કરીશું પ્રેમ.
* * *
મંદિર સાથે પરણી મીરાં, રાજમહલથી છૂટી રે;
કૃષ્ણ નામની ચૂડી પહેરી, માધવની અંગૂઠી રે!
* * *
આપણે આપણી રીતે રહેવું:
ખડક થવું હોય તો ખડક:
નહીં તો નદી જેમ નિરાંતે વહેવું!
* * *
શ્યામ મારો આ કોરો કાગળ
એમાં દોરો તમે કુંડળી
અને કહો કે મળશું ક્યારે?
* * *
કોઈ રસ્તાની ધારે ધારે બેસી સાંજસવારે
તારી રાહ જોઉં છું.
ઊડતાં ઊડતાં પંખીઓ પણ તારું નામ પોકારે
તારી રાહ જોઉં છું
* * *
એક ભૂરા આકાશની આશા ફૂટી
મને ડાળખીને પંખીની ભાષા ફૂટી
* * *
આંખ તો મારી આથમી રહી
કાનના કૂવા ખાલી
એક પછી એક ઇન્દ્રિય કહે :
હમણાં હું તો ચાલી
* * *
પરપોટાનો ફોટો લેવામાં
દરિયો કેમ ભૂંસાઈ ગયો!
* * *
અમને માયા લગાડીને, છાયા ઉઠાવીને
મનમગતો માણસ એક ચાલ્યો ગયો
રણઝણતા ગીત મહીં, પાગલ આ પ્રીત મહીં
થનગનતો માણસ એક ચાલ્યો ગયો.
* * *
મોરપિચ્છની રજાઈ ઓઢી
તમે સૂઓને શ્યામ
અમને થાય પછી આરામ...
* * *
ઘૂંઘટપટની ઘુઘરિયાળી વાત ગગનમાં ધૂપ થઈ
એક દિવસ તો ગાતાં ગાતાં મીરાં ચૂપ થઈ
* * *
હું સાવ અજાણ્યો યાત્રી!
ક્યાંથી આવ્યો, ક્યાં હું ચાલ્યો;
નહીં ખબર કે ખાત્રી.