ટાઇમ લિસ્ટવાળા શાહીન બાગનાં દાદીએ કહ્યું, મોદી તો મારા પુત્ર જેવા

ટાઇમ લિસ્ટવાળા શાહીન બાગનાં દાદીએ કહ્યું, મોદી તો મારા પુત્ર જેવા

બિલ્કિસ દાદી

આંતરરાષ્ટ્રીય ટાઇમ મૅગેઝિનની વિશ્વની 100 સૌથી પ્રભાવશાળી વ્યક્તિઓમાં સમાવિષ્ટ દિલ્હીનાં બિલ્કિસ દાદીએ વડા પ્રધાન નરેન્દ્ર મોદીને પુત્ર સમાન ગણાવ્યા છે. દિલ્હીમાં નાગરિકતા કાયદા સામે વિરોધ-પ્રદર્શનમાં ખ્યાતિ પામેલાં ૮૨ વર્ષનાં બિલ્કિસ દાદીને ટાઇમ મૅગેઝિનના મોસ્ટ ઇન્ફ્લુએન્શલ 100માં સમાવેશથી આનંદ સાથે આશ્ચર્ય થયું છે. દિલ્હીમાં નાગરિકતા કાયદા વિરોધી દેખાવો દરમ્યાન બિલ્કિસ બાનો તથા અન્ય બે વૃદ્ધાઓ એ વિરોધ-પ્રદર્શનની ઓળખ બની ગઈ હતી.

ટાઇમ મૅગેઝિને મોસ્ટ ઇન્ફ્લુએન્શલની યાદીમાં ભારતમાંથી વડા પ્રધાન નરેન્દ્ર મોદી અને બિલ્કિસ દાદી ઉપરાંત અભિનેતા આયુષ્માન ખુરાના, જીવશાસ્ત્રી રવીન્દ્ર ગુપ્તા અને આલ્ફાબેટ સીઈઓ સુંદર પિચાઈનો પણ સમાવેશ છે. બુધવારે જાહેર કરવામાં આવેલી ઉપરોક્ત યાદીમાં કલાકારો, રાષ્ટ્રીય નેતાઓ, સામાજિક આગેવાનો, વિજ્ઞાનીઓ વગેરેનો સમાવેશ છે.