ટૅટૂએ પકડાવ્યા ચોરને

Published: 7th February, 2021 12:33 IST | Prakash Bambhrolia | Mumbai

નાલાસોપારામાં બંધ ઘરમાં ચોરી કરતી વખતે સીસીટીવી કૅમેરામાં હાથ પરનું ટૅટૂ ઝડપાઈ ગયા બાદ પોલીસે આરોપી અને તેના સાથીને શોધી કાઢ્યા

આરોપીઓ પાસેથી જપ્ત મુદ્દામાલ સાથે તુળીંજ પોલીસ-સ્ટેશનની ટીમ
આરોપીઓ પાસેથી જપ્ત મુદ્દામાલ સાથે તુળીંજ પોલીસ-સ્ટેશનની ટીમ

નાલાસોપારામાં એક બંધ ઘરમાંથી મોબાઇલ, ઘડિયાળ અને બાઇકની ચોરી થવાના મામલામાં ચોરની ઓળખ હાથ પરના ટૅટૂ પરથી કરીને પોલીસે કેસ સૉલ્વ કર્યો હોવાનું જાણવા મળ્યું હતું. ચોર તેના એક સાથીની મદદથી દરવાજાની કડી ખોલતો હતો ત્યારે તેના હાથ પર ઇંગ્લિશમાં લખેલું ‘સિદ્ધેશ’ દરવાજાની ઉપરના ભાગમાં લાગેલા સીસીટીવી કૅમેરામાં ઝડપાઈ ગયું હતું. પોલીસે નાલાસોપારા અને આસપાસમાં રહેતા સિદ્ધેશ નામના ૫૦થી ૬૦ યુવકોની તપાસ કર્યા બાદ ચોરેલી બાઇક પર જઈ રહેલા ચોરને ઝડપી લીધો હતો.

નાલાસોપારા (ઈસ્ટ)માં તુળીજ પોલીસ-સ્ટેશનની હદમાં આવેલા મનીષ અપાર્ટમેન્ટમાં એક બંધ ફ્લૅટમાંથી ૨૬ જાન્યુઆરીએ ત્રણ મોબાઇલ, બે કાંડાઘડિયાળ અને સોસાયટીના પાર્કિંગમાંથી એક બાઇકની ચોરી થઈ હતી. તસ્કરોએ ઘરના દરવાજાની કડી તોડીને દરવાજો ખોલ્યો હોવાનું પોલીસતપાસમાં જણાયું હતું. ફરિયાદ નોંધ્યા બાદ આરોપીઓને પકડવા માટે પોલીસ કામે લાગી હતી. ફરિયાદી પરિવાર તીર્થયાત્રા પર ગયો હતો ત્યારે તેમના બંધ ઘરમાં ચોરી થઈ હતી.

Tattooબંધ ફ્લૅટનો દરવાજો ખોલતી વખતે હાથ પરનું ટૅટૂ સીસીટીવી કૅમેરામાં ઝડપાઈ ગયું

જે ફ્લૅટમાં ચોરી થઈ હતી ત્યાંના સીસીટીવી કૅમેરાનાં ફુટેજ જોતી વખતે દરવાજો ખોલવાનો પ્રયાસ કરી રહેલા ચોરના હાથ પર મોટા અક્ષરે અંગ્રેજીમાં ‘સિદ્ધેશ’ લખેલું ટૅટૂ સ્પષ્ટ દેખાતું હતું. આરોપીએ ચહેરા પર રૂમાલ બાંધ્યો હતો, જ્યારે તેના સાથીએ ટોપી પહેરી હોવાથી તેમને ઓળખવા મુશ્કેલ હતા; પરંતુ ટૅટૂની મદદથી પોલીસ ત્રણ ટીમ બનાવીને આરોપીને શોધવાના કામે લાગી હતી.

તુલીજ પોલીસ-સ્ટેશનના સબ- ઇન્સ્પેક્ટર સંદેશ પાલાંડેએ ‘મિડ-ડે’ને કહ્યું હતું કે ‘વહેલી સવારની ચોરીની આ ઘટનામાં આરોપીઓને ઓળખવાનું મુશ્કેલ હતું, પરંતુ ચોરના હાથ પરના ટૅટૂના આધારે અમે નાલાસોપારા અને આસપાસમાં રહેતા સિદ્ધેશ નામના ૫૦થી ૬૦ યુવકોની તપાસ કરી હતી. તેમના હાથમાં ટૅટૂ નહોતું. થોડો સમય તો અમે નિરાશ થયા હતા, પરંતુ ખબરીઓને કામે લગાડ્યા હોવાથી સંતોષ ભવન નામના વિસ્તારમાં સિદ્ધેશ નામનો યુવક બાઇક પર ફરતો હોવાની માહિતી મળી હતી. અમે આ યુવકને બાઇકના પેપર જોવાના નામે રોક્યો ત્યારે તેના હાથ પર ‘સિદ્ધેશ’ નામનું મોટું ટૅટૂ જોયા બાદ તે જ ચોર હોવાનું જણાયું હતું. પૂછપરછ કરતાં પોતે ચોરી કરી હોવાનું તેણે કબૂલ્યું હતું. આથી અમે સિદ્ધેશ ચનોરા અને તેના સાથી સશાંત વણકરની ધરપકડ કરી હતી.’

પોલીસે આરોપીઓ પાસેથી ત્રણ મોબાઇલ, બે ઘડિયાળ અને બાઇક મળીને ૬૩,૦૦૦ રૂપિયાની માલમતા જપ્ત કરી હતી. આરોપીઓ રીઢા ગુનેગાર છે અને તેમણે બંધ ઘરોમાં સ્ક્રૂ-ડ્રાઇવરની મદદથી કેટલીક ચોરી કરી હોવાનું કબૂલ્યું હોવાથી એકસાથે ચોરીના કેટલાક કેસ સૉલ્વ થઈ ગયા હોવાનું પોલીસ-અધિકારીએ જણાવ્યું હતું.

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK