મીરા-ભાઈંદરમાં પ્રૉપર્ટી ટૅક્સ ન ભરનાર લોકોનાં નામ જાહેર સ્થળોએ મુકાશે

મીરા-ભાઈંદરમાં પ્રૉપર્ટી ટૅક્સ ન ભરનાર લોકોનાં નામ જાહેર સ્થળોએ મુકાશે

પ્રતીકાત્મક તસવીર

આર્થિક વર્ષ પૂરું થવાને માત્ર ત્રણ અઠવાડિયાં બાકી હોવા છતાં મીરા-ભાઈંદરમાં પ્રૉપર્ટી ટૅક્સનું કલેક્શન ધાર્યા કરતાં ઘણું ઓછું થયું હોવાથી પાલિકા દ્વારા ડિફૉલ્ટરોનાં નામ જાહેર સ્થળોએ મૂકીને તેમને શરમાવવાનો નિર્ણય લીધો છે. મીરા-ભાઈંદરમાં રહેણાક, ઇન્ડસ્ટ્રિયલ અને કમર્શિયલ મળીને કુલ ૩,૪૮,૪૭૭ યુનિટ છે. આ તમામ યુનિટના વાર્ષિક ૧૮૧ કરોડ રૂપિયા ટૅક્સનો લક્ષ્યાંક રખાયો છે, પરંતુ અત્યાર સુધી માત્ર ૧૨૧ કરોડ જ ટૅક્સ પ્રાપ્ત થયો છે.

લોકો પ્રૉપર્ટી ટૅક્સ ન ભરતા હોવાનું ધ્યાનમાં આવ્યા બાદ મીરા-ભાઈંદર મહાનગરપાલિકાના કમિશનર ચંદ્રકાન્ત ડાંગેએ લોકો પાસેથી ટૅક્સ વસૂલ કરવા માટે બાંયો ચડાવી છે. ૨૦૧૯-’૨૦નું આર્થિક વર્ષ પૂરું થવાને ત્રણ અઠવાડિયાં બાકી છે ત્યારે ૧૮૧ કરોડ રૂપિયાના ટૅક્સ-લક્ષ્યાંક સામે માત્ર ૧૨૧ કરોડ જ ટૅક્સ લોકોએ ભર્યો છે.

ADVERTISEMENT

કુલ યુનિટધારકોમાંથી ૮૯૯ એવા છે જેમનો ૧ લાખથી વધુ રૂપિયાનો ટૅક્સ ભરવાનો બાકી છે, જે ૨૪ કરોડ રૂપિયા થાય છે. આ ડિફૉલ્ટરોને અનેક વખત ટૅક્સ ભરવાની નોટિસ અપાયા બાદ પણ તેઓ ભરતા ન હોવાથી તેમનાં નામ જાહેર સ્થળોએ મૂકવાની સાથે તેમનાં પાણીનાં કનેક્શન કાપી નાખવાનો નિર્ણય પાલિકાએ લીધો છે. આ સિવાય ઢોલ-નગારાં વગાડીને પણ ડિફૉલ્ટરોને શરમાવવાની યોજના છે.

ચંદ્રકાન્ત ડાંગેએ કહ્યું હતું કે ‘કોઈ પણ મહાનગરપાલિકામાં પ્રૉપર્ટી ટૅક્સ આવકનો મૂળ સ્રોત હોય છે. મોટા પ્રમાણમાં લોકો ટૅક્સ ભરતા ન હોય તો વિકાસનાં કામ અટકી પડવાથી જેઓ નિયમિત ટૅક્સ ભરે છે તેમને અન્યાય થાય છે. આથી અમે જેમનો ૧ લાખ રૂપિયાથી વધુનો ટૅક્સ બાકી છે તેમનાં નામ જાહેર સ્થળોએ બૅનર પર લખવાનો નિર્ણય લીધો છે. શરમને લીધે આવા લોકો ટૅક્સ ભરશે.’