જમ્મુ-કાશ્મીરને યોગ્ય સમયે સંપૂર્ણ રાજ્યનો દરજ્જો અપાશે: અમિત શાહ

Published: 14th February, 2021 14:02 IST | Gujarati Mid-day Correspondent | New Delhi

ગૃહપ્રધાને કહ્યું, હવે રાજાઓ અને રાણીઓના પરિવારોમાં જન્મેલી વ્યક્તિઓ કે વારસાગત શાસકો નહીં, જનતાના ચૂંટાયેલા પ્રતિનિધિઓ રાજ્યમાં શાસન ચલાવશે

સંસદના બજેટ-સેશન દરમ્યાન ગૃહપ્રધાન અમિત શાહ (તસવીર: પી.ટી.આઇ.)
સંસદના બજેટ-સેશન દરમ્યાન ગૃહપ્રધાન અમિત શાહ (તસવીર: પી.ટી.આઇ.)

કેન્દ્રના ગૃહપ્રધાન અમિત શાહે ગઈ કાલે લોકસભામાં જણાવ્યું હતું કે ‘જમ્મુ-કાશ્મીર પર પેઢીઓથી રાજ કરતા લોકોની સરખામણીમાં છેલ્લાં બે વર્ષમાં એ રાજ્ય માટે કેન્દ્ર સરકારે ઘણું કર્યું છે. વર્ષ ૨૦૧૯માં બંધારણની કલમો ૩૭૦ અને ૩૫-એ હટાવીને તેનો દરજ્જો બદલ્યા પછી કેન્દ્ર સરકારે યોજનાઓ, જોગવાઈઓ, સહાય અને ફાળવણીઓના રૂપમાં કેન્દ્રશાસિત જમ્મુ-કાશ્મીર અને ત્યાંની જનતાના વિકાસ માટે ઘણાં કાર્યો કર્યાં છે. યોગ્ય સમયે તેને રાજ્યનો દરજ્જો પણ આપવામાં આવશે.’

જમ્મુ-કાશ્મીર પુનર્ગઠન (સુધારા) ખરડા પરની ચર્ચાનો ઉત્તર આપતાં ગૃહપ્રધાને આ પ્રસ્તાવિત ખરડા દ્વારા જમ્મુ-કાશ્મીરને ફરી રાજ્યનો દરજ્જો મળવાની આશા પર પાણી ફરી વળશે એવો પ્રચાર કરતા વિપક્ષી સંસદસભ્યો પર આકરા પ્રહાર કર્યા હતા. ઓલ ઇન્ડિયા સર્વિસિસ ઑફિસર્સની જમ્મુ-કાશ્મીર કૅડરને અરુણાચલ પ્રદેશ-ગોવા-મિઝોરમ યુનિયન ટેરિટરી  કૅડરમાં ભેળવી દેવા માટેના એ ખરડાને લોકસભામાં ‘વૉઇસ વોટ’થી બહાલી આપવામાં આવી હતી.

અમિત શાહે જણાવ્યું હતું કે ‘આ ખરડાને જમ્મુ-કાશ્મીરના રાજ્ય તરીકેના દરજ્જા જોડે કોઈ સંબંધ નથી. આ ખરડાને પગલે એ પ્રદેશના નાગરિકોએ તેમની જમીન ગુમાવવી નહીં પડે. વિકાસકાર્યો માટે સરકાર પાસે પૂરતા પ્રમાણમાં જમીન-ભૂખંડો છે. હવે રાજાઓ અને રાણીઓના પરિવારોમાં જન્મેલી વ્યક્તિઓ કે વારસાગત શાસકો નહીં, જનતાના ચૂંટાયેલા પ્રતિનિધિઓ જમ્મુ-કાશ્મીરમાં શાસન ચલાવશે.’

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK