ગૅસ લીકેજ થયો, પણ ક્યાંથી?
પ્રતીકાત્મક તસવીર
ફાયરબ્રિગેડ કન્ટ્રોલને શનિવારે મધરાત બાદ ૧૨.૪૩ વાગ્યે ચેમ્બુરમાંથી કૉલ મળ્યો હતો કે કોઈક જગ્યાએ ગૅસ લીકેજ થયો છે. આવી જ ફરિયાદ ઘાટકોપર, વિક્રોલી, પવઈ અને આસપાસના વિસ્તારોમાંથી આવવા માંડી હતી એમ મુંબઈ મહાનગરપાલિકાના ડિઝૅસ્ટર મૅનેજમેન્ટે જણાવ્યું હતું.
શરૂઆતમાં એવું કહેવાયું હતું કે ગોવંડીની ફાર્માસ્યુટિકલ યુએસ વિટામિન કંપનીમાંથી આ ગૅસ-ગળતર થયું છે, પણ ફાયરબ્રિગેડે એની તપાસ કરતાં ગૅસ-ગળતર ક્યાંથી થઈ રહ્યું છે એનું મૂળ મળ્યું નહોતું.
ફાયરબ્રિગેડે આ બાબતે ચેમ્બુરમાં જ આવેલા હિન્દુસ્તાન પેટ્રોલિયમ કૉર્પોરેશન લિમિટેડ, ભારત પેટ્રોલિયમ કૉર્પોરેશન લિમિટેડ, મહાનગર ગૅસ લિમિટેડ, રાષ્ટ્રીય કેમિકલ ઍન્ડ ફર્ટિલાઇઝરને પણ જાણ કરી હતી. ફાયરબ્રિગેડના ચીફ ફાયર ઑફિસર પ્રભાત રહાંગદળેએ ‘મિડ-ડે’ને કહ્યું હતું કે ‘અમે યુએસ વિટામિન કંપની અને એની આજુબાજુની કંપનીઓની તપાસ કરી હતી, પણ એ ગૅસ-ગળતર ક્યાંથી થયું એની અમને જાણ થઈ શકી નહોતી. એ ગંધ બહુ લાઇટ હતી અને ત્યાર બાદ ઊડી ગઈ હતી. ઘણી વખત ચોમાસાના દિવસોમાં કુદરતી રીતે વાતાવરણમાં આવું બનતું હોય છે પણ એ વિશે ચોક્કસ કાંઈ કહી ન શકાય. અમે તપાસ કરી હતી, પણ અમને એ ગૅસ ક્યાંથી નીકળે છે એની જાણ થઈ નહોતી.’
મુંબઈ મહાનગરપાલિકાએ આ બાબતે ટ્વીટ કરતાં કહ્યું હતું કે ‘પરિસ્થિતિ અંકુશ હેઠળ છે. એ ગંધ ક્યાંથી આવતી હતી એ શોધી કઢાશે. ફાયરબ્રિગેડના જરૂરી લાગે એ બધાં જ વાહનો ઘટનાસ્થળે મોકલાવાયાં હતાં. ફાયરબ્રિગેડના ૧૭ ફાયર અપ્લાયન્સીસ (વાહનો)ત્યાં પહોંચી ગયાં હતાં અને અનાઉન્સમેન્ટ કરી રહ્યાં હતાં અને જરૂર પડે તો પરિસ્થિતિને પહોંચી વળવા તૈયાર હતાં.
પાલિકાએ લોકોને પેનિક ન થવાનું સૂચન કર્યું હતું અને કહ્યું હતું કે અમે પરિસ્થિતિ પર નજર રાખી રહ્યા છીએ. જો કોઈને એ ગંધથી ત્રાસ થતો હોય તો તેણે મોં પર ભીનો ટુવાલ બાંધવો અથવા ભીનો રૂમાલ માસ્ક તરીકે લગાવવો એવી સૂચનાઓ એ વિસ્તારના લોકોને મેગાફોનથી અપાઈ હતી. બીએમસીના ડિઝાસ્ટર મૅનેજમેન્ટને જ્યારે આ વિશે પૂછવામાં આવ્યું ત્યારે આસિસ્ટન્ટ શિફ્ટ ઇન્ચાર્જ વિકાસ કાંબળેએ કહ્યું હતું કે ફાયરબ્રિગેડના જણાવ્યા મુજબ તેમને એ ગૅસ ક્યાંથી લીક થયો હતો એ જાણવા મળ્યું નહોતું. એ જ રીતે ડીશ-ડિરેક્ટોરેટ ઑફ ઇન્ડસ્ટ્રીયલ સેફ્ટી અૅન્ડ હેલ્થના ડિરેક્ટર રાઠોડે પણ તેમના રિપોર્ટમાં કહ્યું છે કે યુએસ વિટામીન કંપનીની તપાસ કરાઈ હતી, પણ ગૅસ લીકનું મૂળ સ્થાન જાણવા મળ્યું નહોતું.