ભાઇંદરમાં ટ્રેનમાંથી ફેંકાયેલી બાળકી : પોલીસને જોઈએ છે તમારી મદદ

Published: 24th November, 2012 06:54 IST

ભાઈંદર પાસે ચાલતી ટ્રેનમાંથી એક દિવસની બાળકીને પ્લાસ્ટિકની થેલીમાં બાંધીને ફેંકી દેવામાં આવી હતી. આ ઘટના બન્યાને દોઢ મહિનો થયો હોવા છતાં આરોપીની કોઈ જાણકારી ન મળતાં પોલીસે અંતે લોકોની મદદ લીધી છે.


ભાઈંદરમાં ૧૧ ઑક્ટોબરે મોડી રાતે ચર્ચગેટથી વિરાર જતી ટ્રેન ભાઈંદર રેલવે-સ્ટેશનથી થોડી આગળ ગઈ ત્યારે એક વ્યક્તિએ પ્લાસ્ટિકની થેલીમાં એક દિવસની નવજાત બાળકીને ફેંકી દીધી હતી. ભાઈંદર રેલવે-સ્ટેશનની આગળ આવેલી ખાડીમાં આ થેલી નાખવાનો તે વ્યક્તિનો ઇરાદો હતો, પણ નિશાન ચૂકતાં થેલી ટ્રૅક પર પડી હતી. મોડી રાતે આ થેલીને રેલવેના એક કર્મચારીએ જોતાં તેણે એ વાતની જાણ રેલવે-પોલીસને કરી હતી.

આ કેસને સૉલ્વ કરવા ૬ પોલીસ-અધિકારીઓની વિશેષ ટીમ બનાવવામાં આવી છે. આ ટીમે બોરીવલીથી વિરાર સુધીની ૩૦ જેટલી હૉસ્પિટલના રેકૉર્ડ તપાસ્યા હોવા છતાં એ કેસ સૉલ્વ કરવામાં નિષ્ફળ રહી હતી. અંતે પોલીસે કેસ સૉલ્વ કરવા જનતાની મદદ લેવી પડી છે. પોલીસે તમામ પોલીસ-સ્ટેશનોમાં બાળકીનો ફોટો લગાવીને લોકોને મદદ કરવા કહ્યું છે.

મુંબઈ રેલવેના ક્રાઇમ બ્રાન્ચના સિનિયર પોલીસ-ઇન્સ્પેક્ટર એન. એચ. શેખે આ વિશે વધુ માહિતી આપતાં ‘મિડ-ડે’ને કહ્યું હતું કે ‘આ કેસ સૉલ્વ કરવા અમે અમારી રીતે બધા પ્રયત્નો કર્યા હોવા છતાં કોઈ કડી ન મળતી હોવાથી અંતે અમે લોકોની મદદ લીધી છે. આ કેસ સૉલ્વ કરવો અમારા માટે ખૂબ જરૂરી છે, કારણ કે માનવતાની દૃષ્ટિએ આ એક પાપ છે અને આવો ગુનો કરનારને સજા મળવી જરૂરી છે. હાલમાં અમે પોલીસ-સ્ટેશનોમાં પોસ્ટર લગાડીને લોકોને મદદ કરવા કહ્યું છે. ત્યાર બાદ ઠેકઠેકાણે પોસ્ટરો લગાવવામાં આવશે. આ વિશે માહિતી આપનારની ઓળખ ગુપ્ત રાખવામાં આવશે.’

ક્યાં જાણ કરશો?


આ બાળકી વિશે કોઈ પણ પ્રકારની માહિતી ધરાવતા હો તો પોલીસને ૯૭૭૩૪૯૮૭૦૩ અને ૯૮૨૧૨૬૦૭૦૫ નંબર પર જાણ કરો.

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK