બીજેપીના ગઢમાં વાજપેયીના જન્મદિવસની ઉજવણી નીરસ

Published: Dec 28, 2011, 08:36 IST

ઘાટકોપર-ઈસ્ટની રાજાવાડીમાં આવેલી બાલ્કન-જી-બારીના હૉલમાં મેડિકલ-કૅમ્પના આયોજનની સાથે-સાથે ઘાટકોપર બીજેપી (ભારતીય જનતા પાર્ટી)ના વરિષ્ઠ નેતા અને ભૂતપૂર્વ વડા પ્રધાન અટલ બિહારી વાજપેયીનો ૮૮મો જન્મદિવસ પણ મનાવવામાં આવ્યો હતો.

 

આ કૅમ્પનું આયોજન ઘાટકોપર-ઈસ્ટનાં બીજેપીનાં વાઇસ-પ્રેસિડન્ટ ફાલ્ગુની દવે દ્વારા કરવામાં આવ્યું હતું. જોકે સ્થાનિક રહેવાસીઓને બીજેપીના ગઢ સમા ઘાટકોપરમાં અટલ બિહારી વાજપેયીના જન્મદિવસની ઉજવણી નીરસ લાગી હતી.

આ વિશે માહિતી આપતાં ફાલ્ગુની દવેએ મિડ-ડે LOCALને કહ્યું હતું કે ‘૨૫ ડિસેમ્બરે રવિવારે બીજેપીના નેતા અટલ બિહારી વાજપેયીના ૮૮મા જન્મદિવસની ઉજવણી અમે ઘાટકોપર-ઈસ્ટના બીજેપીના વિધાનસભ્ય પ્રકાશ મહેતાના માર્ગદર્શન અને ગારોડિયાનગર-રાજાવાડી વિસ્તારના વૉર્ડ નંબર ૧૨૭ના નગરસેવક ભાલચંદ્ર શિરસાટની રાહબરી હેઠળ મેડિકલ-કૅમ્પનું આયોજન કરી કરવાનું નક્કી કર્યું હતું. સવારે ૧૦ વાગ્યાથી બપોરે ૩ વાગ્યા સુધી ચાલેલા આ કૅમ્પમાં ફ્રી આઇ ચેક-અપ, ફક્ત ૫૦ રૂપિયામાં ચશ્માંનું વિતરણ, મફતમાં મોતિયાંનું ઑપરેશન, ડાયાબિટીઝ અને બ્લડ-પ્રેશર ચેક-અપ કરવામાં આવ્યું હતું. આઇ ચેક-અપમાં જેમને મોતિયાંનાં ઑપરેશનની જરૂર હતી તેવી વ્યક્તિઓનું સોમૈયા હૉસ્પિટલમાં ઑપરેશન કરવામાં આવશે જેનો સંપૂર્ણ ખર્ચ લાયન્સ ક્લબ દ્વારા ફાલ્ગુની દવે કરશે.’

આ કાર્યક્રમમાં નગરસેવક ભાલચંદ્ર શિરસાટ, બીજેપી મુંબઈના જનરલ સેક્રેટરી અશ્વિન વ્યાસ, ઘાટકોપર-ઈસ્ટના બીજેપી જનરલ સેક્રેટરી વિકાસ કામત, વૉર્ડ નંબર ૧૨૭ના બીજેપી પ્રેસિડન્ટ દિનેશ ભટ્ટ અને બીજેપીના અનેક પદાધિકારીઓ તથા ઘાટકોપરની સંસ્થાઓના મહાનુભાવોએ હાજરી આપી હતી.

સ્થાનિક રહેવાસીઓએ બીજેપી-નેતાના જન્મદિવસની ઉજવણીના પ્રત્યાઘાત આપતાં મિડ-ડે LOCALને કહ્યું હતું કે ‘બીજેપીના ગઢ સમા ઘાટકોપરમાં જે રીતે લાલકૃષ્ણ અડવાણીની જનચેતના યાત્રાનું સ્વાગત થયું હતું એ રીતે જ અટલ બિહારી વાજપેયીનો જન્મદિવસ પણ ઘાટકોપરના બીજેપીના કાર્યકરો હોંશપૂર્વક ઊજવશે એવી અમારી માન્યતા હતી, પરંતુ એ ઉત્સાહ-ઉમંગ તેમના જન્મદિવસે જોવા મળ્યો નહોતો. રસ્તાઓ પર અટલ બિહારી વાજપેયીના જન્મદિવસનાં વધામણાં આપતાં બૅનરોમાં પણ કંજૂસાઈ કરવામાં આવી હતી. એકંદરે અટલ બિહારી વાજપેયીના જન્મદિવસે નીરસતા હતી.’

Loading...
 
 
Loading...
Loading...
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK