કૃત્રિમ વરસાદનો ખર્ચ વધવાની શક્યતા

Published: 23rd August, 2012 05:11 IST

કેન્દ્ર અને રાજ્ય સરકારની મંજૂરી મળે એ પહેલાં જ કૃત્રિમ વરસાદ પાડવાનો ખર્ચ વધી ગયો છે જે લગભગ ૨૦ કરોડ રૂપિયા પર પહોંચી જાય એવી શક્યતા છે. સુધરાઈ કૃત્રિમ વરસાદનો પ્રયોગ સપ્ટેમ્બર મહિનામાં કરવાની છે, જેમાં વિમાનો દ્વારા વાદળાં પર સોડિયમ ક્લોરાઇડનો છંટકાવ કરીને ભાત્સા અને અપર વૈતરણાના વિસ્તારમાં વરસાદ પાડવામાં આવવાનો છે.

કૃત્રિમ વરસાદ પાડવા માટે ઇઝરાયલની કંપની પાસેથી પ્લેન તેમ જ ટેક્નૉલૉજી અને રડાર એમ કુલ મળીને ૧૨ કરોડ રૂપિયાનો ખર્ચ થશે એવો અંદાજ કાઢવામાં આવ્યો હતો, પણ ઇઝરાયલની કંપની મારફત આ પ્લેન ભારતમાં લાવવા માટે અનેક પ્રકારની આંતરરાષ્ટ્રીય મંજૂરીની જરૂર પડવાની છે જેને લીધે સુધરાઈ સાઉથ આફ્રિકાથી વિમાન લાવવાનો કૉન્ટ્રૅક્ટ હવે માયઅવની નામની પ્રાઇવેટ કંપનીને આપવા માટે ચર્ચા કરી રહી છે.

ભારતમાં આવા પ્રકારનાં પ્લેન નથી બનતાં એને લીધે પ્લેન અને હવામાન ખાતા તરફથી રડાર મગાવવામાં આવવાનું હોવાથી આ ખર્ચ ૨૦ કરોડ પર પહોંચી ગયો હોવાનું સ્ટૅન્ડિંગ કમિટીના ચૅરમૅન રાહુલ શેવાળેએ ગઈ કાલે જણાવ્યું હતું. આ પ્લેનનો ઉપયોગ કરવા માટે સુધરાઈએ નાગરી ઉડાણ ખાતામાંથી મંજૂરી મેળવવી પડશે. એ સાથે જ સુરક્ષાની દૃષ્ટિને ધ્યાનમાં રાખીને ગૃહ વિભાગની પણ મંજૂરી લેવી પડશે.

 ગૃહ વિભાગ તરફથી મંજૂરી મેળવવા માટે મૅકોરોટ કંપનીના અધિકારીઓ અને સુધરાઈના વૉટર ડિપાર્ટમેન્ટના અધિકારીઓ ગઈ કાલે દિલ્હી જવા રવાના થયા હતા. તમામ પ્રક્રિયાને પૂર્ણ થતાં બે દિવસ લાગશે એવો સુધરાઈનો અંદાજ છે.

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK