ધનુષનું રામબાણ ‘કોલાવેરી ડી...’

Published: 25th December, 2011 07:49 IST

‘કોલાવેરી ડી...’ની હિન્દી રીમેક માટે ટોચના ઘણા કલાકારોની હરીફાઈનો અંત લાવી પોતે જ નવું સ્વરૂપ લખ્યું



તામિલ અભિનેતા-ગાયક-ગીતકાર ધનુષના ખૂબ જ પ્રખ્યાત થયેલા ગીત ‘કોલાવેરી ડી...’ના હિન્દી સ્વરૂપ માટે બૉલીવુડમાં ઘણા કલાકારોએ પોતાનો ઇન્ટરેસ્ટ બતાવ્યો હતો. એમાં અભિષેક બચ્ચન, અક્ષયકુમાર અને શાહરુખ ખાન વચ્ચે હરીફાઈ હતી એવું માનવામાં આવી રહ્યું હતું. જોકે આ હરીફાઈનો ખુદ ધનુષે જ અંત લાવી દીધો છે. તેણે પોતે જ ગીતના હિન્દી રીમેક માટે શબ્દો લખ્યા છે અને એને ડબ પણ કરશે એવું લાગી રહ્યું છે.

ધનુષ થોડા દિવસ માટે મુંબઈ આવ્યો હતો અને એ દરમ્યાન જ તેણે આ હિન્દી રીમેક પર કામ કર્યું હતું. તે કહે છે, ‘હા, ‘કોલાવેરી ડી...’નું હિન્દી સ્વરૂપ હવે તૈયાર થઈ ગયું છે. ગીતના અમુક શબ્દો ‘ડિસ્ટન્સ પે મેરે ચાંદ ચાંદ, મર ગયી મેરી નીંદ નીંદ...’ છે. ટ્રૅક પણ તૈયાર છે.’

ગીતના શબ્દો તો હિન્દીમાં છે, પણ ખુદ ધનુષ આ ભાષામાં એટલું પ્રભુત્વ નથી ધરાવતો. તે કહે છે, ‘મેં માત્ર હિન્દી જાણતા મારા એક ફ્રેન્ડને ગીતમાં આવતા તામિલ શબ્દોનું ભાષાંતર પૂછું હતું. એ જાણ્યા પછી પ્રાસ બેસે એ રીતે શબ્દો લખ્યા. જો મૂળ ગીત તાંગ્લિશ (તામિલ અને ઇંગ્લિશ)માં હતું, તો આ ગીત હિંગ્લિશ (હિન્દી અને ઇંગ્લિશ) હશે. મેં રીમિક્સ અને જૅઝ વર્ઝન પણ તૈયાર ક્યા છે.’

સિન્ગિંગ માટે પણ તે ઘણો એક્સાઇટેડ છે. તે કહે છે, ‘એ વાત સાચી છે કે હું માત્ર શિખાઉ સિંગર છું અને એને કારણે જ ઘણા ગાયક અને ગીતકારોએ મારી આલોચના કરી છે. સાચી વાત કહું તો હું એક એન્ટરટેઇનર છું અને એ જ મારું કામ છે. પ્રોફેશનલ ગાયક કે ગીતકાર મને ગંભીરતાથી નહીં જ લે, પણ આજે ટેક્નૉલૉજીના ઉપયોગથી કોઈ પણ ગાઈ શકે છે. તમારે માત્ર ધૂનને જ ધ્યાનમાં રાખવાની છે, બાકી કામ તો રેકૉર્ડિસ્ટનું છે. હું એ નથી જાણતો કે મારું નેક્સ્ટ ગીત ‘કોલાવેરી...’નું જ કોઈ સ્વરૂપ હશે, પણ હું મારી ફિલ્મોમાં તો સિન્ગિંગ કરીશ જ.’
Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK