આવી રહ્યું છે મલ્હારની ફિલ્મમાં મિકાનું ગીત, માનસી પણ દેખાશે સાથે....

આવી રહ્યું છે મલ્હારની ફિલ્મમાં મિકાનું ગીત, માનસી પણ દેખાશે સાથે....

મલ્હાર ઠાકર અને માનસી પારેખ સ્ટારર ગોળકેરી ફિલ્મમાં મલ્હાર ઠાકર સાહિલની ભૂમિકામાં જોવા મળશે તો માનસી પારેખ હર્ષિતાની ભૂમિકામાં જોવા મળશે. આ ફિલ્મ બન્ને વચ્ચે રચાતાં પ્રેમસંબંધ જે એક નાજુક વળાંક પર આવીને તૂટી જાય છે તેના આધારે છે. ફિલ્મમાં મલ્હાર એટલે કે સાહિલના માતા પિતાની ભૂમિકા વંદના પાઠક અને સચિન ખેડેકર ભજવતાં જોવા મળશે.

આ ગુજરાતી ફિલ્મ તાજેતરના સમયને નિરૂપે છે. આજના જનરેશનની મુશ્કેલીઓ, તેમના વિચાર અને વલણને સુપેરે પ્રસ્તુત કરે છે. ફિલ્મનું સંગીત પણ આજના જમાનાને અનુરૂપ બનાવવામાં આવ્યું છે.

ADVERTISEMENT

પોતાના જાજરમાન અવાજ અને કર્ણપ્રિય ગીતોથી લાખો લોકોને મંત્રમુગ્ધ કરનાર પ્રખ્યાત ગાયક મિકા સિંહ ગોળકેરી ફિલ્મથી ગુજરાતી પાર્શ્વગાયન ક્ષેત્રે પ્રવેશ કરે છે. તેમણે પહેલીવાર ગુજરાતી ગીત ગાયું છે. આ વિશે કેફિયત આપતા મિકા સિંહ કહે છે, ‘હું ગુજરાતી ભાષામાં ગાવાની તક શોધતો હતો, કેમ કે મેં ઘણી ભાષાઓમાં ગાયું છે. મારા ગુજરાતી ચાહકો માટે એક ગીત હોવું જ જોઈએ એવું મને કેટલાય વખતથી લાગતું હતું. હું જ્યારે પણ વિદેશ મુસાફરી કરું છું ત્યારે હું હંમેશાં મારા ટ્રેક્સ ગાઉં છું. હવે આ ટ્રેક્સમાં એક માતબર ને ધમાકેદાર ગુજરાતી ગીતનો ઉમેરો થશે એનો મને રોમાંચ છે. વિશેષ આનંદ છે કે એક ગુજરાતી ગીત કમ્પોઝ કરવાની મને તક મળી. ''સોણી ગુજરાતની'' ગીત મારી સાથે આલા દરજ્જાના ગાયક પાર્થિવ ગોહિલે ગાયું છે. મને આશા છે મારા ચાહકોને એ પસંદ આવશે.’

આ ગીત વિશે વાત કરતાં પાર્થિવ ગોહિલ જણાવે છે કે, "મિકા સુપર સ્ટાર છે અને મારા પ્રિય મિત્ર પણ. અમે લગભગ 20 વર્ષથી એકબીજાને ઓળખીએ છીએ. બન્ને ગુજરાતીમાં ગીત બનાવવાનું વિચારતાં હતા. જ્યારે ગોળકેરી ફિલ્મ આકાર લઈ રહી હતી ત્યારે અમે આ તક ઝડપી લીધી અને ''સોણી ગુજરાતની'' ગીતની રચના થઈ. મિકાના આગવા અંદાજનો, સ્વરાંકનનો અને ગાયકીનો ત્રિવેણી સંગમ આ ગીતમાં થયો છે."

આ ગીત તો રિલીઝ થઈ જ ગયું છે તેની સાથે જ 7 ફેબ્રુઆરીના રોજ ટ્રેલર પર રિલીઝ કરવામાં આવશે. એટલું જ નહિં આ ફિલ્મ 28 ફેબ્રુઆરીએ રિલીઝ થઈ રહી છે.

 આ પણ વાંચો: Do Not Disturb વિશે વાત કરે છે મલ્હાર ઠાકર અને માનસી પારેખ ગોહિલ

સોલ સૂત્ર નિર્મિત, વિરલ શાહ દિગ્દર્શિત, અમાત્ય ગોરડિયા-વિરલ શાહ લિખિત ‘ગોળકેરી’ ફિલ્મમાં મલ્હાર ઠાકર, માનસી પારેખ, સચિન ખેડેકર અને વંદના પાઠકે અભિનય આપ્યો છે. કિરુણ પરિહાર લિખિત ગીતનું સ્વરાંકન મિકા સિંહ તથા સ્નેહા દેસાઈ લિખિત ગીતનું સ્વરાંકન ઋષિકેશ, સૌરભ અને જસરાજે કર્યું છે. ફિલ્મના વિતરક કોકોનટ મોશન પિચર્સ છે અને મ્યુઝિક પ્રસ્તુતિ ઝેન મ્યુઝિકની છે