આ ફિલ્મને આટલા સમયગાળામાં લગભગ ૩.૧૧ કરોડ વ્યુઝ મળ્યા છે
`ધુરંધર`નો સીન
એક તરફ સિનેમાઘરોમાં રણવીર સિંહની ‘ધુરંધર : ધ રિવેન્જ’ કમાણીના તમામ રેકૉર્ડ તોડી રહી છે તો બીજી તરફ એનો પહેલો ભાગ ‘ધુરંધર’ OTT પ્લૅટફૉર્મ નેટફ્લિક્સ પર પોતાનો દબદબો જમાવવામાં સફળ રહ્યો છે. આ ફિલ્મ ૩૦ જાન્યુઆરીએ OTT પર રિલીઝ થઈ હતી અને ત્યારથી એણે સતત ટૉપ ૧૦ ફિલ્મોની યાદીમાં પોતાની જગ્યા બનાવી રાખી છે. હવે આ ફિલ્મે એસ.એસ. રાજામૌલીની ગ્લોબલ હિટ ‘RRR’નો મોટો રેકૉર્ડ પણ તોડી નાખ્યો છે.
‘ધુરંધર’ (હિન્દી) હવે ગ્લોબલ સ્ટ્રીમિંગ પ્લૅટફૉર્મ પર પ્રથમ ૧૦ અઠવાડિયાંમાં સૌથી વધુ જોવાયેલી ભારતીય ફિલ્મ બની ગઈ છે. આ ફિલ્મને શરૂઆતનાં ૧૦ અઠવાડિયાંમાં ૩૧.૧ મિલ્યન એટલે કે લગભગ ૩.૧૧ કરોડ વ્યુઝ મળ્યા છે. આદિત્ય ધરના નિર્દેશનમાં બનેલી આ ફિલ્મે રામ ચરણ તેજા અને જુનિયર એનટીઆરની બ્લૉકબસ્ટર ‘RRR’ (હિન્દી વર્ઝન)ને બીજા ક્રમે ધકેલી દીધી છે, જેને ૧૦ અઠવાડિયાંમાં લગભગ ૩ કરોડ વ્યુઝ મળ્યા હતા. વ્યુઝની દૃષ્ટિએ હવે ત્રીજા ક્રમે રણબીર કપૂરની ફિલ્મ ‘ઍનિમલ’ છે જેને ૨.૮૫ કરોડ વ્યુઝ મળ્યા હતા, જ્યારે ચોથા ક્રમે શાહરુખ ખાનની ‘જવાન’ છે જેને ૨.૬૨ કરોડ વ્યુઝ મળ્યા હતા.
