રિલાયન્સ ઇન્ડસ્ટ્રીઝ ઑગસ્ટ ૨૦૦૫માં પ્રથમ વાર એક લાખ કરોડની કંપની બની હતી. ત્યાર પછી દર વર્ષે સરેરાશ એના માર્કેટ કૅપમાં એક લાખ કરોડ રૂપિયાનો વધારો થયો છે
રિલાયન્સ ઈન્ડસ્ટ્રી લિમિટેડ
રિલાયન્સ અને ફર્સ્ટ આપણે ત્યાં એકબીજાના પર્યાય બની ગયા છે. રિલાયન્સ એટલે બધ્ધામાં પહેલી! અને પહેલિયતનો આ ટ્રેન્ડ જાળવી રાખતાં ગઈ કાલે વૅલેન્ટાઇન્સ ડેના દિવસે રિલાયન્સ પ્રથમ વાર ૨૦ લાખ કરોડ રૂપિયાનું માર્કેટ કૅપ ધરાવતી દેશની પ્રથમ અને એક માત્ર કંપની બની છે. શૅર ઇન્ટ્રા-ડેમાં ૨૯૬૭ નજીક ઑલટાઇમ હાઈ થઈ છેવટે એકાદ ટકો વધી ૨૯૬૨ ઉપર બંધ થતાં કંપનીનું માર્કેટ કૅપ ૨૦,૦૪,૪૦૨ કરોડ રૂપિયા નોંધાયું છે. (જોકે આ લખાય છે ત્યારે સાંજના ૬.૩૦ વાગ્યે પણ બીએસઈની વેબસાઇટ પર રિલાયન્સનો શૅર ૨૯૬૨ના લેવલે જૈસે-થે હોવાનું દર્શાવાતું હતું. હકીકતમાં આગલો બંધ ૨૯૬૨ નહીં, પણ ૨૯૨૯ હતો. આવો છબરડો કેવળ રિલાયન્સમાં નહીં, કમસે કમ ૬૦ ટકા શૅરોના ભાવમાં ગઈ કાલે જોવાતો હતો!)