પાકિસ્તાનના પ્લેયરોની કિટ પર લાગશે શાહિદ આફ્રિદી ફાઉન્ડેશનનો લોગો
પાકિસ્તાન ક્રિકેટ ટીમ હાલમાં ઇંગ્લૅન્ડમાં ત્રણ ટેસ્ટ મૅચ અને ત્રણ ટી૨૦ મૅચ રમવા માટે પ્રૅક્ટિસ કરી રહી છે. આ પ્લેયરોની પ્લેઇંગ કિટ પર હવે શાહિદ આફ્રિદી ફાઉન્ડેશનનો લોગો જોવા મળશે. તાજેતરમાં પાકિસ્તાન ક્રિકેટ બોર્ડ સાથેની એક બેવરેજ કંપનીનો સ્પૉન્સરશિપ કૉન્ટ્રૅક્ટ પૂરો થઈ ગયો હોવાથી તેઓ અવઢવમાં હતા. તેમને કોઈ સ્પૉન્સર નથી મળી રહ્યો. કોરોના વાઇરસને કારણે કોઈ કંપનીએ રસ નથી દેખાડ્યો અને જેમણે દેખાડ્યો છે તેમણે પહેલાંના કૉન્ટ્રૅક્ટના ફક્ત ૩૦ ટકા વૅલ્યુની ઑફર આપી છે. જોકે હવે આફ્રિદી આગળ આવ્યો છે. આ વિશે આફ્રિદીએ કહ્યું કે અમને જણાવતાં ખુશી થાય છે કે ‘પાકિસ્તાન ક્રિકેટ બોર્ડની ચૅરિટી પાર્ટનર બનવાની સાથે હવે પાકિસ્તાન પ્લેયરોની પ્લેઇંગ કિટ પર શાહિદ આફ્રિદી ફાઉન્ડેશનનો લોગો જોવા મળશે. આ કાર્ય માટે હું વસીમ ખાન અને પાકિસ્તાન ક્રિકેટ બોર્ડનો આભાર માનું છું અને પાકિસ્તાન ક્રિકેટ ટીમના પ્લેયરોને તેમની ટૂર માટે શુભેચ્છા આપું છું.’
