૧૯૭ રને ૮ વિકેટ ગુમાવનાર યજમાન ટીમની પૂંછડિયા બૅટર્સે લાજ બચાવી, કાંગારૂ કૅપ્ટન પૅટ કમિન્સે ૧૫ ઓવરમાં ૫૪ રન આપીને ૩ વિકેટ લીધી હતી.
કાંગારૂ કૅપ્ટન પૅટ કમિન્સે ૧૫ ઓવરમાં ૫૪ રન આપીને ૩ વિકેટ લીધી હતી.
ડરબનમાં ચાલી રહેલી પહેલી ટેસ્ટ-મૅચના ત્રીજા દિવસે મહેમાન ટીમે ૧૩૯ રનની લીડ જાળવી રાખી હતી. પહેલી ઇનિંગ્સમાં ઑસ્ટ્રેલિયાએ મૅટ રેનશૉના ૩૯૭ બૉલમાં ૧૯૦ રનની મદદથી ૩૯૦ રન કર્યા. જોકે સાઉથ આફ્રિકા પહેલી ઇનિંગ્સમાં ૭૮ ઓવરમાં ૨૮૪-૧૦નો જ સ્કોર કરી શક્યું હતું. દિવસના અંતે કાંગારૂઓએ ૫.૪ ઓવરમાં ૩૩-૦નો સ્કોર કર્યો હતો.
ત્રીજા દિવસે સાઉથ આફ્રિકાએ ૮.૪ ઓવરમાં ૨૭-૧ના સ્કોરથી પહેલી ઇનિંગ્સને આગળ વધારી હતી. ત્રીજા ક્રમે રમવા આવેલા બૅટર ડેવિડ બેડિંગહૅમે ૭૩ બૉલમાં ૯ ફોરની મદદથી ૪૯ રનની મહત્ત્વપૂર્ણ ઇનિંગ્સ રમી હતી. સાઉથ આફ્રિકાએ ૫૪.૨ ઓવરમાં ૧૯૭ રનના સ્કોર પર આઠ વિકેટ ગુમાવી દીધી હતી.
નવમી વિકેટ માટે થયેલી ૯૨ બૉલમાં બાવન રનની ભાગીદારીથી સાઉથ આફ્રિકાને સન્માનજનક સ્કોર મેળવવામાં મદદ મળી હતી. સાઇમન હાર્મરે ૭૫ બૉલમાં ૩૫ રન અને કેશવ મહારાજે ૪૪ બૉલમાં ૩૪ રન કર્યા હતા.
કાંગારૂ બોલિંગ યુનિટમાંથી સ્પિનર નૅથન લાયન સહિત ફાસ્ટ બોલર્સ જૉશ હેઝલવુડ અને મિચલ સ્ટાર્કને ૨-૨ વિકેટ મળી હતી. કૅપ્ટન અને ફાસ્ટ બોલર પૅટ કમિન્સે ૧૫ ઓવરમાં ૫૪ રન આપીને ૩ વિકેટ લીધી હતી.
221
ટેસ્ટ-ક્રિકેટમાં સૌથી વધુ આટલા કૅચ પકડનાર ફીલ્ડર બન્યો સ્ટીવ સ્મિથ. જો રૂટનો ૨૨૦ કૅચનો રેકૉર્ડ તોડ્યો.
