કાંગારૂઓ ચારેય વન-ડે સિરીઝ ક્લીન સ્વીપ કરીને જીત્યા છે, બંગલાદેશ ૨૦૦૫માં એક માત્ર વન-ડે મૅચ જીત્યું છે આ હરીફ સામે...
૧૫ વર્ષ બાદ વન-ડે સિરીઝમાં ટકરાશે ઑસ્ટ્રેલિયા અને બંગલાદેશ
ઑસ્ટ્રેલિયન ટીમ ત્રણ વન-ડે અને ત્રણ T20 મૅચની સિરીઝ રમવા હાલમાં બંગલાદેશ પહોંચી છે. ઢાકામાં આજથી બન્ને ટીમ વચ્ચે ત્રણ વન-ડે મૅચની સિરીઝ શરૂ થશે. આજે ૯ જૂન, ૧૧ જૂન અને ૧૪ જૂનની તમામ મૅચ ભારતીય સમય અનુસાર સવારે ૧૦.૩૦ વાગ્યે જ શરૂ થશે. મિચલ માર્શ પગની ઘૂંટીની ઇન્જરીમાંથી સ્વસ્થ થયો ન હોવાથી બંગલાદેશ સામેની વન-ડે સિરીઝમાં પણ વિકેટકીપર-બૅટર જૉશ ઇંગ્લિસ કાંગારૂ ટીમની કમાન સંભાળશે.
ઑસ્ટ્રેલિયા હાલમાં પાકિસ્તાનમાં ૨-૧થી ત્રણ વન-ડે મૅચની સિરીઝ હારીને આવ્યું છે, જ્યારે બંગલાદેશ ઘરઆંગણે છેલ્લી ત્રણેય વન-ડે સિરીઝમાં વેસ્ટ ઇન્ડીઝ, પાકિસ્તાન અને ન્યુ ઝીલૅન્ડ સામે ૨-૧થી જીત્યું છે.
બંગલાદેશ અને ઑસ્ટ્રેલિયા વચ્ચે ૧૯૯૦થી ૨૦૨૩ વચ્ચે બાવીસ વન-ડે મૅચ રમાઈ છે એમાંથી ઑસ્ટ્રેલિયા ૨૦ મૅચ અને બંગલાદેશ એક વન-ડે મૅચ જીત્યું છે, જ્યારે ૨૦૧૭માં એક મૅચ નો-રિઝલ્ટ રહી હતી. ૨૦૦૫માં બંગલાદેશે ૨૫૦ રનનો ટાર્ગેટ ચેઝ કરીને ઑસ્ટ્રેલિયાની ધરતી પર જ કાંગારૂઓ સામે એકમાત્ર વન-ડે મૅચ જીત હતી.
બન્ને ટીમ વચ્ચે ૨૦૦૩, ૨૦૦૬, ૨૦૦૮ અને ૨૦૧૧માં ચાર વન-ડે સિરીઝ રમાઈ છે. ચારેય સિરીઝમાં ઑસ્ટ્રેલિયાએ ૩-૦થી ક્લીન સ્વીપ કરી હતી. બન્ને ટીમ ૧૫ વર્ષ બાદ એકબીજા સામે વન-ડે સિરીઝ રમશે.
