ગટરનાં ઢાંકણાં ચોરાતાં હોવાથી થોડાક સમય પહેલાં એક મહિલા અને તેનું ૧૦ મહિનાનું બાળક ગટરમાં પડી ગયાં હતાં
તસવીર સૌજન્યઃ સોશ્યલ મીડિયા
પાકિસ્તાનમાં ગરીબી અને મોંઘવારી બન્નેએ માઝા મૂકી છે. એને કારણે લોકો જાહેર સંપત્તિઓની ચોરી કરીને પૈસા રળી રહ્યા છે. છેલ્લા કેટલાય સમયથી અહીં રોડ પરની ગટરોનાં લોખંડનાં ઢાંકણાં ચોરાઈ રહ્યાં છે. રોડ પર ચાલતી વખતે અચાનક ઢાકણું ગાયબ હોય એવું મૅનહોલ જોવા મળી જાય છે. વરસાદની સીઝનમાં તો એને કારણે જોખમ અનેકગણું વધી જાય છે. ગટરનાં ઢાંકણાં ચોરાઈ જવાની સમસ્યા એટલી વધી ગઈ છે કે પાકિસ્તાનના પંજાબનાં મુખ્ય પ્રધાન મરિયમ નવાઝ એનાથી વાજ આવી ગયાં છે. તેમણે જાહેરાત કરી છે કે જે કોઈ પણ ગટરનાં ઢાંકણાંની ચોરી કરશે તેને ૧૦ વર્ષ સુધીની જેલની સજા થશે. હવે પંજાબમાં કોઈ ગટરનું ઢાંકણ ચોરતાં, ખરીદતાં કે વેચતાં પકડાશે તો તેણે ૧૦ વર્ષ સુધી જેલની હવા ખાવી પડી શકે છે. ગટરનાં ઢાંકણાં ચોરાતાં હોવાથી થોડાક સમય પહેલાં એક મહિલા અને તેનું ૧૦ મહિનાનું બાળક ગટરમાં પડી ગયાં હતાં. તેમને બચાવવાની ખૂબ કોશિશ કરવા છતાં પાણીમાં વહી ગયાં હતાં. છેલ્લા એક મહિનામાં આવી ડઝનબંધ ઘટનાઓને કારણે આ મામલે કડક પગલાં લેવાનું નક્કી કરવું પડ્યું છે.
