મુંબઈમાં ૨૪ કલાકમાં ૬ ઇંચ ખાબક્યા બાદ આખો દિવસ ઝરમર વરસાદ નોંધાયો : આજે અને આવતી કાલે છૂટોછવાયો વરસાદ પડવાની શક્યતા : સુસવાટાભેર પવન સાથે વીજળીના કડાકાભડાકા થઈ શકે છે
ફાઈલ તસવીર
સપ્ટેમ્બર મહિનામાં ચોમાસું પૂરું થયા બાદ ઑક્ટોબર મહિનાનું પહેલું અઠવાડિયું વીતી ગયું હોવા છતાં મુંબઈમાં હજી વરસાદ પડી રહ્યો છે. ગઈ કાલે સવારના પૂરા થયેલા ૨૪ કલાક દરમ્યાન મુંબઈ શહેરમાં ૬ ઇંચ અને પરાવિસ્તારમાં ૪ ઇંચ જેટલો વરસાદ પડ્યો હતો. જોકે ગઈ કાલે આખો દિવસ ઝરમર વરસાદ નોંધાયો હતો. હવામાન વિભાગે આગામી ૨૪ કલાકમાં પણ આકાશ વાદળથી છવાયેલું રહેવાની અને છૂટોછવાયો વરસાદ પડવાની આગાહી કરી હતી.
ઑક્ટોબર મહિનામાં આકાશમાંથી વાદળાં ગાયબ થઈ જતાં હોય છે એટલે કડક તડકો અનુભવાતો હોય છે, પણ આ વર્ષે વરસાદ જવાનું નામ નથી લેતો. હવામાન વિભાગની માહિતી મુજબ ગઈ કાલે સવારે પૂરા થયેલા ૨૪ કલાકમાં તળ મુંબઈમાં ૧૫૬.૭૯ એમએમ એટલે કે ૬ ઇંચ તો પૂર્વનાં પરાંમાં ૯૯.૧૯ એમએમ એટલે કે ૪ ઇંચ અને પશ્ચિમનાં પરાંમાં ૯૫.૮૪ એમએમ એટલે કે ૪ ઇંચ વરસાદ નોંધાયો હતો. ઑક્ટોબર મહિનામાં આટલો વરસાદ દસ વર્ષમાં બીજી વખત પડ્યો છે.
ADVERTISEMENT
૪ ઑક્ટોબર ૧૯૮૮ના રોજ મુંબઈમાં એક દિવસમાં ૧૪૦ એમએમ વરસાદનો રેકૉર્ડ થયો હતો. આવી જ રીતે ગયા વર્ષે ૧૫ ઑક્ટોબરે ૧૭૦ એમએમ એટલે કે સાત ઇંચ વરસાદ થયો હતો. ઑક્ટોબર મહિનામાં વરસાદ પડવાનો સિલસિલો આ વર્ષે પણ કાયમ રહ્યો છે.
શુક્રવારે બપોર બાદથી શનિવારની સવાર સુધીમાં ગ્રાન્ટ રોડ, ફોર્ટ અને લોઅર પરેલમાં ૨૦૦ એમએમ એટલે કે આઠ ઇંચ વરસાદ પડ્યો હતો.
હવામાન વિભાગે આગામી ૨૪ કલાકમાં પણ ઝરમરથી હળવો વરસાદ પડવાની આગાહી કરીને મુંબઈમાં યલો અલર્ટ જારી કરી છે. મુંબઈ ઉપરાંત થાણે અને પાલઘરમાં પણ સુસવાટાભેર પવન સાથે વીજળીના કડાકાભડાકા સહિત વરસાદ પડી શકે છે.
