ફિલિપીન્સમાં ૭.૮ની તીવ્રતાનો વિનાશક ધરતીકંપ, ઓછામાં ઓછા ૩૨ લોકોએ જીવ ગુમાવ્યા, બે કલાકમાં ૧૩૮ આફ્ટરશૉક, સુનામીથી દરિયામાં ૪.૬ ફુટથી પણ વધુ ઊંચાં મોજાં ઊછળ્યાં : સેન્ટોસ શહેરમાં ૭ જણ ગુમ છે
ગઈ કાલે ફિલિપીન્સમાં શક્તિશાળી ભૂકંપ છતાં શિક્ષકોએ સ્કૂલનાં બાળકો અને સ્થિતિ બન્નેને સંયમપૂર્વક સંભાળી લીધાં હતાં
ફિલિપીન્સમાં ગઈ કાલે સવારે ૭.૮ની તીવ્રતાનો શક્તિશાળી ભૂકંપ આવતાં ઓછામાં ઓછા ૩૨ લોકોએ જીવ ગુમાવ્યા છે અને ૨૦૦થી વધુ ઘાયલ થયા છે. ધરતીકંપે જે રીતે તબાહી મચાવી છે એ જોતાં મરણાંક વધવાની શક્યતા છે.
ADVERTISEMENT
ગઈ કાલે ફિલિપીન્સમાં આવેલા ભૂકંપ બાદની તબાહીની તસવીરોમાં ભારે માળખાગત નુકસાનનાં દૃશ્યો જોવા મળ્યાં હતાં
ભૂકંપને કારણે અનેક બિલ્ડિંગો, દુકાનો, ઑફિસો અને કમર્શિયલ બિલ્ડિંગોને ભારે નુકસાન થયું છે. સ્થાનિક સમય મુજબ સવારે ૧૧ વાગ્યા સુધીમાં ૧૩૮ આફ્ટરશૉક નોંધાયા હતા. આફ્ટરશૉકની તીવ્રતા ૧.૩થી ૬.૭ સુધીની હતી.
ભારતીય સમય મુજબ સવારે ૫.૦૭ વાગ્યે ભૂકંપ આવ્યો હતો. ભૂકંપનું કેન્દ્ર મિંડાનાઓ ટાપુ નજીક દરિયામાં હતું. આ વર્ષે ફિલિપીન્સમાં આવેલો આ સૌથી શક્તિશાળી ભૂકંપ છે. ભૂકંપના કારણે સુનામી પણ આવી હતી. સૌથી ઊંચી લહેરો લગભગ ૪.૬થી વધુ ફુટ સુધી ઊછળી હતી. ઇન્ડોનેશિયા અને મલેશિયાએ પણ સાવચેતી તરીકે સુનામીની ચેતવણી જાહેર કરી હતી, પરંતુ થોડા કલાક પછી એને પાછી ખેંચી લીધી હતી.
