સરકાર થઇ મહેરબાન, ગુજરાતી ફિલ્મો પરની સબસિડી 50થી વધારી 75 લાખ કરાઇ
સરકાર થઇ મહેરબાન
લોકસભા ચુંટણી પહેલા સરકાર દરેક ક્ષેત્રના લોકોને ખુશ કરવા માંગે છે. ત્યારે હવે સરકારની નજર ઉભો થઇ રહેલ બહુ મોટો વર્ગ એટલે ગુજરાતી ફિલ્મ ઉદ્યોગ પર પડ્યો છે. સરકારે હવે જાહેર કરેલી સબસિડીમાં 5 લાખથી લઇને 25 લાખ સુધી વધારી દેવામાં આવી છે.
ફિલ્મ પર સબસિડી વધારીને 75 લાખ સુધી કરાઇ
ADVERTISEMENT
ગુજરાત સરકારે વર્ષ 2016માં જાહેર કરેલ ગુજરાતી ફિલ્મની પોલિસીમાં એ ગ્રેડ મેળવનાર ફિલ્મને 50 લાખ સબસિડી પેટે આપવામાં આવતી હતી. જે હવે તેમાં એ પ્લસ ગ્રેડનો ઉમેરો કરીને તેની સબસિડી 75 લાખ કરવામાં આવી છે. તો બી ગ્રેડ મેળવના ફિલ્મને 25 લાખથી વધારીને 40 લાખ, સી ગ્રેડ મેળવનાર ફિલ્મને 10 લાખથી વધારીને 30 લાખ કરવામાં આવી છે. તો ડિ ગ્રેડ ફિલ્મમાં 5 લાખથી વધારીને 20 લાખ કરવામાં આવી છે. જ્યારે ઇ ગ્રેડ અને એફ ગ્રેડ ઉમેરીને અનુક્રમે 10 લાખ અને 5 લાખની સબસિડી જાહેર કરી છે.
ગુજરાત સરકારે 2 ફેબ્રુઆરી, 2016ના રોજ ગુજરાતી ફિલ્મોને લઇને સબસિડીની નવી પોલિસી જાહેર કરી હતી. આ પહેલા મિનિમમ સબસિડીની રકમ 5 લાખ હતી અને નવી પોલિસીમાં પણ 5 લાખ છે, પરંતુ પહેલાં 100માંથી ઓછામાં ઓછા 41 માર્ક્સ મેળવે તો 5 લાખ મળતા હતા જેને બદલે હવે 21 માર્ક્સ મેળવશે તો પણ તે ફિલ્મ 5 લાખ મેળવવાને પાત્ર બની જશે.
શું છે મહત્વનો ફેરફાર
ગુજરાતી ફિલ્મની સબસિડીને લઇને નિયમોમાં ફેરફાર કર્યા છે. જેમાં સાહિત્યકૃતિ પરથી જ કોઈ ફિલ્મ બનાવશે તેને ફિલ્મને મળવાપાત્ર સબસિડીની રકમ કરતાં 25 ટકા રકમ વધુ મળશે. તો બીજી તરફ શ્રેષ્ઠ ગુજરાતી ફિલ્મના નિર્માતા અને દિગ્દર્શક બંનેને 2.5 લાખ રૂપિયાનો રોકડ પુરસ્કાર મળશે. ટિકિટ વેચાણ પરથી મળતા માર્ક્સમાં સબસિડી માટે 100 માર્ક્સમાંથી 20 માર્ક્સ ટિકિટ વેચાણ પરથી આપવામાં આવે છે. અગાઉ 2 લાખ ટિકિટ વેચાય તો 20 માર્ક્સ મળતા હતા, જે હવે 50 હજાર ટિકિટ વેચાશે તો 20 માર્ક્સ મળશે.
