બૉયફ્રેન્ડને સીધો કરવો હોય તો આવું કરવું જ પડે
પ્યાર કે સાઈડ ઇફેક્ટ્સ : રાજકોટમાં ગર્લફ્રેન્ડે પેટ્રોલ છાંટીને સળગાવી દીધેલી બોયફ્રેન્ડની કાર. તસવીર : ચિરાગ ચોટલિયા
ADVERTISEMENT
પ્રેમ અને લાગણી કાબૂમાં રહે ત્યાં સુધી સારાં છે, બાકી કાબૂ બહારના સંબંધો ક્યારેક કફોડી હાલત સર્જી દેતા હોય છે. ગઈ કાલે રાજકોટ શહેરમાં આ ઉક્તિ સાચી કહેવડાવે એવી ઘટના ઘટી હતી. રાજકોટના ડૉ. યાજ્ઞિક રોડ પર આવેલા સ્ટાર ચેમ્બર્સ નામના બિલ્ડિંગના પાર્કિંગમાં બુધવારે બપોરે અઢી વાગ્યે હૉન્ડા કંપનીની જૅઝ મૉડલની કાર અચાનક જ સળગી ગઈ. કારને ઠારવા માટે ફાયર-બ્રિગેડ આવી અને ફાયર-બ્રિગેડમાં એન્ટ્રી થઈ એટલે પોલીસ-ડિપાર્ટમેન્ટમાં એન્ટ્રી થઈ અને પોલીસ-ડિપાર્ટમેન્ટમાં એન્ટ્રી થઈ એના એક કલાક પછી જે વાત જાણવા મળી એ જાણ્યા પછી હસવું કે રડવું એની સમજ નહોતી પડતી.
હકીકત એ હતી કે આ કાર રાજકોટમાં પ્રાઇવેટ ટયુશનક્લાસ ચલાવતા બત્રીસ વર્ષના સાહિલ શાહ (નામ બદલ્યું છે)ની હતી. સાહિલ અને રાજકોટમાં જ રહેતી વાણી ભટ્ટ (નામ બદલ્યું છે) વચ્ચે બે વર્ષથી અફેર હતું. બન્નેના ઘરે આ વાતની ખબર નહોતી.
બુધવારે વાણી સાહિલને મળવા માટે ક્લાસ પર આવી, પણ ક્લાસ ચાલુ હોવાથી તેણે મળવા માટે પાર્કિંગમાં આવવાની ના પાડી દીધી. સાહિલની ના સાંભળીને વાણીને ગુસ્સો આવ્યો અને આ ગુસ્સામાં બન્ને વચ્ચે ઝઘડો શરૂ થયો. આ ઝઘડામાં વાણીએ સાહિલને ધમકી આપી દીધી કે જો તું નીચે મળવા નહીં આવે તો તારે પસ્તાવું પડશે. સાહિલે પણ સંભળાવી દીધું કે તારાથી થાય એ કરી લે. બસ, પત્યું. વાણીએ પાર્કિંગમાં પડેલા પોતાના ઍક્ટિવા સ્કૂટરની પેટ્રોલની ટાંકીમાંથી મૅક્સિમમ પેટ્રોલ કાઢ્યું અને સાહિલની કાર પર છાંટીને માચીસ મૂકી રવાના થઈ ગઈ.
રાજકોટના પ્રદ્યુમન પોલીસ-સ્ટેશનના પોલીસ-ઇન્સ્પેક્ટર એચ. કે. બાંભણિયાએ ઘટનાની પુષ્ટિ આપતાં કહ્યું હતું કે ‘હા, આ ઘટના બની છે, પણ છોકરીના હિતમાં અમે એ બન્નેનાં નામ જાહેર કરવા નથી માગતા.
વાણીનો ‘મિડ-ડે’એ કૉન્ટૅક્ટ કર્યો ત્યારે તેણે કોઈ સંકોચ વિના ગાડી સળગાવી નાખ્યાનું કબૂલ કર્યું હતું અને કહ્યું હતું કે ‘બૉયફ્રેન્ડને સીધો કરવો હોય તો આવું કરવું જ પડે.’
