પ્રાર્થનાસભાનું આયોજન કરનારી મહિલાને પાડોશીએ ફટકારી

અંધેરી (ઈસ્ટ)ના મરોલમાં પોતાના ઘરમાં પ્રાર્થનાસભાનું આયોજન કરવા બદલ એક સિનિયર સિટિઝન મહિલા પર હુમલો કરનારી બે વ્યક્તિની એમઆઇડીસી પોલીસે ધરપકડ કરી હતી.

આરોપીઓ ૪૭ વર્ષના શશિકાંત શિંદે તથા ૪૦ વર્ષના ગંગાધર ખૈરે ૬૧ વર્ષનાં  વિક્ટોરિયા સિરીના પાડોશમાં જ રહે છે. વિક્ટોરિયા સિરી છેલ્લાં સાત વર્ષથી પોતાના ઘરમાં પ્રાર્થનાસભાનું આયોજન કરતા આવ્યાં છે, પરંતુ રવિવારે રાત્રે પ્રાર્થનાસભા દરમ્યાન પાડોશીઓએ ત્યાં ઉપસ્થિત તમામ લોકોને ગાળો ભાંડી હતી ત્યારે વિક્ટોરિયા સિરીએ તેમને રોકવાનો પ્રયાસ કર્યો હતો.

બીજી તરફ પાડોશીઓની એવી ફરિયાદ હતી કે પ્રાર્થનાસભા દરમ્યાન થતા લોકોના ઘોંઘાટને કારણે ધોરણ દસમા ભણતા તેમના બાળકોને તકલીફ પડતી હતી. આ મામલે બોલાચાલી થતાં મામલો વધુ બીચક્યો હતો. વિક્ટોરિયા સિરીએ કહ્યું હતું કે બન્ને આરોપીઓએ મારી મારપીટ કરી હતી એટલે આવતા વર્ષથી પ્રાર્થનાસભા અન્ય જગ્યાએ યોજીશ.