મિડ-ડે ઇમ્પેક્ટ : નાલાસોપારાના સ્મશાનમાં આવી નવી ચિતા

નાલાસોપારા-વેસ્ટમાં આવેલા સમેળપાડા સ્મશાનમાં એક ચિતા ચોરાયાના, અન્ય ત્રણ ચિતા પણ તૂટેલી હાલમાં હોવાથી મૃતદેહને અગ્નિસંસ્કાર આપતી વખતે ઘણી મુસીબતો વેઠવી પડતી હોવાના તેમ જ સ્મશાનમાં પાયાની સુવિધાઓનો સદંતર અભાવ હોવાના સમાચાર મિડ-ડે LOCALમાં પ્રસિદ્ધ થયા બાદ પાલિકાનું પ્રશાસન સફાળું જાગ્યું હતું અને તાબડતોબ નવી ચિતાનો ઑર્ડર આપવાની સાથે સ્મશાનમાં જરૂરી તમામ સુવિધાઓ ઉપલબ્ધ કરાવવા સંબંધિત ડિપાર્ટમેન્ટને સૂચના આપવામાં આવી હતી.

સમાચાર પ્રસિદ્ધ થયાના દોઢેક મહિનામાં જ સ્મશાનમાં નવી ચિતા બેસાડવામાં આવી છે. ઉપરાંત લોકોને બેસવા બાંકડાઓ, ટૉઇલેટ, પાણીની ટાંકી વગેરેની વ્યવસ્થા પણ બે-ત્રણ મહિનામાં થઈ જશે. આ સાથે સ્મશાન ફરતે પચીસેક ફૂટની ઊંચાઈ ધરાવતા પતરાના શેડ પણ લગાવવામાં આવી રહ્યા છે જેથી આજુબાજુનાં મકાનોમાં રહેતા લોકોને તકલીફ ન થાય.