ટ્રાફિક-ડિપાર્ટમેન્ટનો ગજબ ઝટકો

Published: 3rd December, 2014 04:52 IST

ઓલ્ડ માણેકલાલ એસ્ટેટના રહેવાસીઓએ હવે કુર્લા જવા માટે પહેલાં હોટેલ રોઆ સુધી જવું પડશે


રોહિત પરીખ

ઘાટકોપર-વેસ્ટમાં ઓલ્ડ માણેકલાલ એસ્ટેટથી LBC માર્ગ પર કુર્લા તરફ જવાના યુ-ટર્નને ટ્રાફિક-વિભાગે અચાનક બંધ કરી દેતાં ઓલ્ડ માણેકલાલ એસ્ટેટના રહેવાસીઓને નવાઈ લાગી છે. સ્થાનિક રહેવાસીઓ કહે છે કે ટ્રાફિક-વિભાગે કોઈ પણ રોડને બંધ કરી દેતાં પહેલાં સ્થાનિક રહેવાસીઓનો આ બાબત પર મત લેવો જોઈએ.

આ માહિતી આપતાં પ્રૉપર્ટી- કન્સલ્ટન્સીનું કામ કરતા સામાજિક કાર્યકર મનીષ વોરાએ મિડ-ડે LOCALને કહ્યું હતું કે ‘LBC માર્ગ પરના ટ્રાફિકને કન્ટ્રોલ કરવામાં નિષ્ફળ ગયેલા ટ્રાફિક-વિભાગે હવે મનસ્વી નિર્ણય લઈને રોડ બંધ કરવાના શરૂ કર્યા છે. ઓલ્ડ માણેકલાલ એસ્ટેટના રહેવાસીઓએ કુર્લા તરફ જવું હોય તો તેમણે યુ-ટર્ન લેવા છેક એક કિલોમીટર દૂર ગંગાવાડી જંક્શન પહેલાં આવતી હોટેલ રોઆ પાસે જવું પડે એવી પરિસ્થિતિ કિરાણી લેન પાસેનો યુ-ટર્ન બંધ કરવાથી થઈ છે.’

આ બાબતને સમજાવતાં મનીષ વોરાએ કહ્યું હતું કે ‘પહેલાં અમે ફક્ત ૫૦ મીટરના અંતરમાંથી યુ-ટર્ન લઈને કુર્લા તરફ જઈ શકતા હતા. હવે આ યુ-ટર્ન બંધ થવાથી અમારે કુર્લા જવા માટે છેક ગંગાવાડી જંક્શન જવું પડશે. એનું કારણ એ છે કે એ પહેલાં મહાત્મા ગાંધી રોડ જંક્શન, સવોર્દય હૉસ્પિટલ જંક્શન પાસે યુ-ટર્ન છે જ નહીં. આ રોડ પર પર ૨૪ કલાક ટ્રાફિક-જૅમની સમસ્યા છે. એટલે ઓલ્ડ માણેકલાલ એસ્ટેટથી જે યુ-ટર્ન લેતાં અમને અત્યારે બેથી દસ મિનિટ લાગે છે એ જ યુ-ટર્ન લેવા અમે એક કિલોમીટર દૂર જઈશું તો અમને કલાકથી વધુ સમય લાગશે. આ બાબતનો ટ્રાફિક-વિભાગે વિચાર કર્યો છે ખરો? કે પછી લોકોના સમયની અને પૈસાની બરબાદી તરફ એમનું ધ્યાન જ નથી?’

આ અગાઉ ટ્રાફિક-વિભાગે LBC માર્ગ પર નિત્યાનંદ નગર જંક્શનથી વિક્રોલી તરફના યુ-ટર્નને પણ આવી જ રીતે અચાનક બંધ કરતું ર્બોડ લગાડી દીધું હતું, જેનો સાંઈનાથનગરના રહેવાસીઓએ સખત વિરોધ કર્યો હતો. પરિણામે ટ્રાફિક-વિભાગે હજી સુધી કોઈ વાહન યુ-ટર્ન લે તો એના પર ઍક્શન લેવાનું નથી રાખ્યું, પણ તેમણે હજી સુધી આ યુ-ટર્નનું ર્બોડ હટાવ્યું પણ નથી.

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK