મીરા-ભાઈંદર પાલિકાની વીઆઇપી દરજ્જાવાળી કચરાની ગાડી શોધી રહી છે પોલીસ
વીઆઇપી દરજ્જાવાળી કચરાની ગાડી શોધવા માટે પોલીસે કમર કસી
મીરા-ભાઈંદર મહાનગરપાલિકાની કચરાની ગાડી પર પીળા રંગની બત્તી જોવા મળી હતી. આ વિશે ‘મિડ-ડે’ દ્વારા અહેવાલ પણ પ્રસિદ્ધ કરવામાં આવ્યો હતો. ત્યાર બાદ પોલીસ વિભાગ બત્તી ધરાવતી આ ગાડીને શોધવા દોડતી થઈ હતી. પોલીસની ટીમ દ્વારા ટ્રાફિક બેટ, સિગ્નલ પૉઇન્ટ વગેરે પરિસરમાં ચાંપતી નજર રાખવામાં આવી હતી તેમ જ ટ્રાફિક પોલીસ વિભાગના સિનિયર પોલીસ ઇન્સ્પેક્ટર અનિલ પવાર સુધ્ધાં તપાસ-ટીમ સાથે જોડાયા હતા. આ તપાસ વખતે પોલીસે કાશીમીરા પરિસરમાં મીરા-ભાઈંદર મહાનગરપાલિકાની પીળી લાઇટ લગાડેલી ગાડી દેખાતાં એને રોકીને એના પર કાર્યવાહી કરી હતી. મહારાષ્ટ્ર મોટર વાહન અધિનિયમ ૧૯૮૯ની કલમ ૨૩૫, ૧૭૭ અનુસાર બત્તી લગાડવા બદલ દંડાત્મક કાર્યવાહી કરવામાં આવી હતી. એ ઉપરાંત ભાઈંદરમાં પણ પૅટ્રોલિંગ કરીને પોલીસ દ્વારા ભાઈંદર-વેસ્ટના ઉત્તન રોડ પીળી લાઇટ લગાડેલી ગાડી પર પણ દંડાત્મક કાર્યવાહી કરી હતી.
