રામ જેઠમલાણીનો રાજ્યસભામાં ધડાકો
ADVERTISEMENT
જાણીતા ધારાશાસ્ત્રી અને ભારતીય જનતા પાર્ટીના રાજ્યસભાના સભ્ય રામ જેઠમલાણીએ લોકપાલ બિલના મુદ્દે રાજ્યસભામાં ચાલી રહેલી ચર્ચામાં બ્લૅક મનીને મુદ્દે કમેન્ટ કરી હતી કે સ્વિસ બૅન્કમાં કાળું નાણું ધરાવતી વ્યક્તિઓની યાદીમાં ભારતના એક ભૂતપૂર્વ વડા પ્રધાનનું પણ નામ હતું. તેમની આ ટિપ્પણીને કારણે રાજ્યસભામાં ઊહાપોહ મચી ગયો હતો. રાજ્યસભામાં લોકપાલ બિલના મુદ્દે ચર્ચા કરતાં રામ જેઠમલાણીએ ૧૯૯૧માં પબ્લિશ થયેલા એક યુરોપિયન મૅગેઝિનનો સંદર્ભ આપીને આ કમેન્ટ કરી હતી. રામ જેઠમલાણીની આ કમેન્ટ સામે મણિશંકર ઐયરના વડપણ હેઠળ કૉન્ગ્રેસે ભારે વિરોધ નોંધાવ્યો હતો. રામ જેઠમલાણીએ આ મુદ્દે વધારે વાત કરતાં કહ્યું હતું કે ‘જર્મન સરકારે સ્વિસ બૅન્કના ખાતેદારોનાં નામ મેળવ્યાં છે અને તે આ નામ મિત્રરાષ્ટ્રો સાથે વહેંચવા તૈયાર છે. આ સિવાય અમેરિકા અને ફ્રાન્સે પણ સ્વિસ બૅન્કમાં અકાઉન્ટ ધરાવતા તેમના ખાતેદારોનાં નામ મેળવ્યાં છે, પણ ભારતે ખાસ પ્રોટોકૉલ સાઇન કર્યો હોવાથી એને આ વિશેની માત્ર ભવિષ્યની માહિતી મળી શકશે, ભૂતકાળની નહીં. સ્વિટ્્ઝરલૅન્ડ સાથે કરેલા કરાર પ્રમાણે ભારતે એનો ભૂતકાળને લગતી માહિતી મેળવવાનો હક પડતો મૂક્યો છે. હવે દેશમાં ભ્રષ્ટાચારની હાલત આટલી બધી કથળી ગઈ છે ત્યારે ભારતીય જનતા પાર્ટી કોઈ સંજોગોમાં આ નબળા લોકપાલને ટેકો આપી ન શકે.