૪ વર્ષની બાળકીની છેડતી બદલ બાંદરા સ્કૂલનો સ્વિમિંગ ઇન્સ્ટ્રક્ટર બરતરફ

બાંદરાની સેન્ટ સ્ટેનિસ્લોસ હાઈ સ્કૂલના એક પુરુષ સ્વિમિંગ ઇન્સ્ટ્રક્ટર સામે ચાર વર્ષની બાળકીના પેરન્ટ દ્વારા કરવામાં આવેલી છેડતીની ફરિયાદને પગલે ઇન્સ્ટ્રક્ટરને નોકરી પરથી કાઢી મૂકવામાં આવ્યા છે. સ્કૂલે એવો પણ દાવો કર્યો છે કે મહિલાઓ માટેના સ્વિમિંગ ક્લાસિસ તેમણે હાલ પૂરતા બંધ કરી દીધા છે.

ચાર વર્ષની બાળકીના પેરન્ટે ફરિયાદનો એક પત્ર પોલીસને પણ મોકલ્યો છે, જેમાં જણાવવામાં આવ્યું છે કે સ્કૂલના પ્રિન્સિપાલ ફાધર જ્યુડ ફર્નાન્ડિસે આ બાબતે ૨૧ ઑક્ટોબર સુધી પગલાં નહોતાં લીધાં. પેરન્ટે એવો પણ આક્ષેપ કર્યો છે કે સ્વિમિંગ પૂલનું પાણી બિનઆરોગ્યપ્રદ છે અને સ્કૂલે સ્વિમિંગ પૂલ માટે સુધરાઈ પાસેથી લાઇસન્સ પણ નથી લીધું.

દરમિયાન ફાધર જ્યુડ ફર્નાન્ડિસે ‘મિડ-ડે’ને કહ્યું હતું કે ફરિયાદ મળી કે તરત અમે ઇન્સ્ટ્રક્ટરને કાઢી મૂક્યો છે અને મહિલાઓ માટેનું સ્વિમિંગ કોચિંગ બંધ કરાવી દીધું છે.