સલમાન ખાનને કારણે રોહિત શેટ્ટી પડ્યો મોડો
રોહિત શેટ્ટી અને સલમાન ખાન
કલર્સના અત્યાર સુધીના તમામ રિયલિટી શોમાં સૌથી હિટ રહેલી ‘બિગ બૉસ’ની આ સીઝનને કારણ એક જ પ્રોડક્શન-હાઉસના બીજા શોને પાછળ ધકેલવો પડ્યો હતો. બન્યું એવું કે ‘બિગ બૉસ’ની પ્રોડ્યુસર એન્ડેમોલશાઇન છે, જ્યારે જે શો પાછળ ધકેલવો પડ્યો એ ‘ખતરોં કે ખિલાડી’ના પ્રોડ્યુસર પણ એન્ડેમોલશાઇન છે. ‘બિગ બૉસ’ પૉપ્યુલર થતાં એને પાંચ વીક લંબાવવાનો નિર્ણય લેવામાં આવ્યો જેને લીધે રોહિત શેટ્ટીનો શો પાછળ ગયો, પણ હવે પ્રશ્ન એ ઊભો થયો છે કે ‘ખતરોં કે ખિલાડી’ના ફિનાલેમાં રોહિત શેટ્ટી કદાચ હાજર નહીં રહે.
છેલ્લી બે સીઝનથી આ સ્ટન્ટ શોના ફિનાલેમાં રોહિત હાજર રહે છે. આ વખતે પણ તેણે એવું પ્લાનિંગ રાખ્યું હતું, પરંતુ ‘બિગ બૉસ’ લંબાઈ જતાં હવે રોહિત માટે મૂંઝવણ ઊભી થઈ છે. ઍક્ચ્યુઅલી રોહિત શેટ્ટી ‘ખતરોં કે ખિલાડી’ પૂરું કરીને તરત જ અજય દેવગન સાથે પોતાની કૉમેડી ફ્રૅન્ચાઇઝી ‘ગોલમાલ’ શરૂ કરવા માગતો હતો, પણ સલમાન ખાનના શોએ રોહિતને પાછળ રાખી દીધો અને અજય દેવગનનું ‘તાન્હાજી’ની સક્સેસનો લાભ લેવાનું આખું ગણિત ઊંધું પાડી દીધું.
