કસીનો માત્ર બે દિવસના કામને કારણે અટકી ગઈ
કસીનો
ઝીફાઇવ પર રિલીઝ થનારી વેબ-સિરીઝ ‘કસીનો’ આજે રિલીઝ થવાની હતી, પણ હવે એ અચોક્કસ મુદત માટે પાછળ ઠેલાઈ છે. માત્ર બે જ દિવસનું કામ બાકી હતું અને પ્રોડ્યુસરે નક્કી કર્યું હતું કે વેબ-સિરીઝને બીજી એપ્રિલે રિલીઝ કરવી. બે દિવસના આ કામમાં થોડું એડિટિંગ અને એડિટિંગ આધારિત બૅકગ્રાઉન્ડ મ્યુઝિકનું કામ કરવાનું હતું. આ કામ થાય એ પહેલાં જ કોરોનાને કારણે લૉકડાઉન થતાં બધાં કામ અટકી ગયાં અને ‘કસીનો’ પણ અટકી ગઈ. ‘કસીનો’ની લીડ સ્ટાર પૂજા બૅનરજીએ કહ્યું કે ‘અત્યારના સમયમાં આ પ્રકારના ડિજિટલ પ્લૅટફૉર્મનું મહત્ત્વ બધાને સમજાઈ રહ્યું છે જેમાં કંઈ ખોટું પણ નથી. મેં પોતે આ વેકેશનમાં ૭થી વધારે વેબ-સિરીઝ જોઈ છે.’
પૂજા હવે વધારે ડિજિટલ પ્લૅટફૉર્મ પર ધ્યાન આપવા માગે છે. પૂજાના કહેવા પ્રમાણે ડિજિટલ પ્લૅટફૉર્મને કારણે મોબાઇલ સાચા અર્થમાં પર્સનલ ટીવી બની ગયું છે.