યુએસ ઓપન પછી કદાચ નિવૃત્ત થનારી ટેનિસ-લેજન્ડ ફેરવેલને યાદગાર બનાવવા મક્કમ
US Open
સેરેના વિલિયમ્સ
ટેનિસજગતમાં સિંગલ્સનાં સેકન્ડ-મોસ્ટ ૨૩ ગ્રૅન્ડ સ્લૅમ ટાઇટલ જીતનાર અમેરિકાની સેરેના વિલિયમ્સ સોમવારે શરૂ થયેલી યુએસ ઓપન ટુર્નામેન્ટ પછી મોટા ભાગે રિટાયર થઈ જવાની છે એટલે તે આ છેલ્લી સ્પર્ધા (યુએસ ઓપન)માં પણ ચૅમ્પિયનપદ મેળવીને ટેનિસજગતમાં સૌથી વધુ ૨૪ સિંગલ્સ ગ્રૅન્ડ સ્લૅમ મેળવનાર ઑસ્ટ્રેલિયાનાં ટેનિસ-લેજન્ડ માર્ગારેટ કોર્ટના વિશ્વવિક્રમ (ઑલ-ટાઇમ રેકૉર્ડ)ની બરાબરીમાં આવવા દૃઢ છે. સોમવારે તેણે ન્યુ યૉર્કના પ્રથમ રાઉન્ડમાં મૉન્ટેનેગ્રોની ડૅન્કા કૉવિનિચને ૬-૩, ૬-૩થી હરાવીને બીજા રાઉન્ડમાં પ્રવેશ કર્યો હતો.
૪૦ વર્ષની ભૂતપૂર્વ વર્લ્ડ નંબર વન સેરેનાની આ સંભવિત આખરી ટુર્નામેન્ટની પ્રથમ મૅચ ૨૫,૦૦૦ પ્રેક્ષકોએ અને કરોડો ટીવી દર્શકોએ માણી હતી. સેરેના આ યુએસ ઓપનમાં મોટી બહેન વીનસ સાથે ડબલ્સમાં પણ ભાગ લઈ રહી છે જેથી અસંખ્ય ચાહકો તેની ગુડબાય જોતાં પહેલાં તેની બે કૅટેગરીની સ્પર્ધા માણી શકશે.