જુહુ બીચ પર ભરતીનાં મોજાંમાં બે યુવાનો તણાયા, એકને બચાવી લેવામાં આવ્યો

બીચ પર હાજર લાઇફગાર્ડે એક યુવકને બચાવી લીધો હતો, પરંતુ ભરતીને કારણે બીજો યુવક પાણીમાં ખેંચાઈ ગયો હતો

પ્રતીકાત્મક તસવીર

જુહુ બીચના સિલ્વર બીચ પર ગોદરેજ ગેટ નજીક શુક્રવારે સવારે બે યુવાનો તણાઈ ગયા હોવાની ઘટના બની હતી. બીચ પર હાજર લાઇફગાર્ડે એક યુવકને બચાવી લીધો હતો, પરંતુ ભરતીને કારણે બીજો યુવક પાણીમાં ખેંચાઈ ગયો હતો.

મુંબઈ ફાયર-બ્રિગેડના એક અધિકારીએ જણાવ્યું હતું કે ‘શુક્રવારે સવારે ૮.૩૦ વાગ્યે આ બનાવ બન્યો હતો. ભરતી હોવા છતાં બે યુવકો દરિયાના પાણીમાં ઊતર્યા હતા. એ સમયે દરિયામાં વધુ કરન્ટ હોવાને કારણે તેઓ અંદર ખેંચાઈ ગયા હતા. લાઇફગાર્ડે તાત્કાલિક ઍક્શન લઈને એક યુવકને બચાવી લીધો હતો, જ્યારે બીજો યુવક દરિયાનાં મોજાં સાથે અંદર તણાઈ ગયો હતો.’

ADVERTISEMENT

ત્યાર બાદ દરિયામાં તણાઈ ગયેલા યુવાનને શોધવા માટે ફાયર-બ્રિગેડ, બૃહન્મુંબઈ મ્યુનિસિપલ કૉર્પોરેશન (BMC) અને પોલીસની ટીમની મદદ લેવામાં આવી હતી. ફાયર વિભાગના કન્ટ્રોલરૂમ તરફથી મળેલી માહિતી મુજબ ભરતીને લીધે સાંજ પછી સર્ચ-ઑપરેશન અટકાવી દેવામાં આવ્યું હતું.                

જુહુના દરિયામાં ડૂબી ગયેલા યુવાનનો મૃતદેહ મળી આવ્યો

જુહુના ગોદરેજ ગેટ પાસે શુક્રવારે સવારે ૮.૩૦ વાગ્યે બે યુવાનો દરિયામાં નાહવા પડ્યા હતા. એમાંના એક યુવક રાજકુમાર સુબ્બાને લાઇફગાર્ડે બચાવી લીધો હતો, પણ તેનો મિત્ર વિજ્ઞેશ મુરુગેશ દેવેન્દ્રમ તણાઈ ગયો હતો. તેને શોધવા ફાયર-બ્રિગેડ અને BMCના લાઇફગાર્ડે દિવસ દરમ્યાન સતત રેસ્ક્યુ ઑપરેશન ચલાવ્યું હતું, પણ તે નહોતો મળ્યો. અધારું થતાં રેસ્ક્યુ ઑપરેશન રોકવામાં આવ્યું હતું. વિજ્ઞેશનો મૃતદેહ શુક્રવારે રાતે ૧૦.૩૦ વાગ્યે એ જ બીચ પર માછીમારોને મળી આવ્યો હતો.