કોરોનાના નિયમોને કોરાણે મૂકીને બર્થ-ડે મનાવવા બદલ ૫૦૦ જણ સામે ફરિયાદ
પ્રતીકાત્મક તસવીર
ડોમ્બિવલી (ઈસ્ટ)ના દેસલપાડામાં એક ઓપન ગ્રાઉન્ડમાં ૧૮ ફેબ્રુઆરીએ બીજેપીના સ્થાનિક નેતાની બર્થ-ડે પાર્ટીનું આયોજન કરવામાં આવ્યું હતું,. એમાં ભાગ લેનાર ૫૦૦ લોકોએ કોવિડના નિયમો પાળ્યા નહોતા એને ધ્યાનમાં લેતાં પાલિકાના અધિકારીઓએ માનપાડા પોલીસ-સ્ટેશનમાં ૫૦૦ લોકો વિરુદ્ધ કોવિડના નિયમોનો ભંગ કરવા બદલ ફરિયાદ નોંધાવી હતી. જોકે હાલમાં એકેય આરોપીની ધરપકડ થઈ નથી.
કલ્યાણ-ડોમ્બિવલી મ્યુનિસિપલ કૉર્પોરેશન (કેડીએમસી)એ શુક્રવારે એક નિવેદનમાં કહ્યું હતું કે ‘દેસલપાડાના એક ઓપન ગ્રાઉન્ડમાં બીજેપીના સ્થાનિક નેતા સંદીપ માલીના જન્મદિવસની પાર્ટી ૧૭મીની મઘરાત બાદ કરવામાં આવી હતી. કેડીએમસીના વૉર્ડ-ઑફિસર અક્ષય ગુડગેને ફરિયાદ મળી હતી કે માસ્ક પહેરવા અને સોશ્યલ ડિસ્ટસ્ટિંગ જાળવવા જેવા કોરોનાવાઇરસનાં ધારાધોરણોનું પાલન કર્યા વિના જન્મદિવસ ઊજવવા માટે સ્થાનિક લોકો મોટી સંખ્યામાં ભેગા થયા હતા. એ દરમ્યાન પાલિકાના અધિકારીઓએ એ પરિસરની મુલાકાત લીધી હતી અને માનપાડા પોલીસ-સ્ટેશનમાં બર્થ-ડે બૉય સંદીપ માલી અને હાજર લોકો સહિત આશરે ૫૦૦ લોકો વિરુદ્ધ ફરિયાદ નોંધાવી હતી.’
ADVERTISEMENT
માનપાડા પોલીસ-સ્ટેશનના સિનિયર ઇન્સ્પેક્ટર દાદાહરિ ચોરેએ ‘મિડ-ડે’ને કહ્યું હતું કે ‘અમે આ લોકો સામે આઇપીસીની કલમ ૨૬૯ અને ૨૭૦ ( એવું કૃત્ય જેના લીધે જીવલેણ ચેપી રોગનો ફેલાવો થવો), ૧૮૮ (સરકારી આદેશનો ભંગ) અને ડિઝૅસ્ટર મૅનેજમેન્ટ કન્ટ્રોલ ઍક્ટની કલમો હેઠળ એફઆઇઆર નોંધ્યો છે. જોકે હાલમાં કોઈની ધરપકડ કરવામાં આવી નથી.’