આ રીંછ છેલ્લાં 15 વર્ષથી જેલમાં છે, તેને થઈ છે આજીવન કેદની સજા
આ રીંછ છેલ્લાં 15 વર્ષથી જેલમાં છે,
કઝાખસ્તાનના કોસ્તાનેય શહેરમાં આવેલી એક જેલમાં લગભગ ૭૦૦ જેટલા માનવકેદીઓ છે. આ જ જેલમાં કેદ છે એક માદા રીંછ. તેને પણ આજીવન કેદની સજા થઈ છે. કાત્યા નામની આ માદા રીંછ સર્કસમાં કામ કરતી હતી. દાયકાઓ પહેલાં આ સર્કસવાળા કોસ્તાનેય શહેરમાં આવ્યા ત્યારે આ કાત્યા સાવ બચ્ચું હતી અને સર્કસના કાફલાથી તે છૂટી પડી ગઈ હતી. આ બચ્ચાને એક કૅમ્પ-સાઇટ પર પાંજરામાં પૂરી રાખવામાં આવ્યું જેથી એ ટૂરિસ્ટોનું મનોરંજન કરી શકે. જોકે એ સમયગાળા દરમ્યાન તેને જોવા આવનારા કેટલાક દર્શકો પર એણે હુમલા કર્યા.
બે માણસો પર તેણે એવો લોહિયાળ હુમલો કર્યો કે એ માણસોને આજીવન શારીરિક અક્ષમતા આવી ગઈ. છેલ્લે જ્યારે એણે એક દારૂ પીધેલા માણસ પર હુમલો કર્યો ત્યારે એ કૅમ્પ-સાઇટવાળાએ કાત્યાને ઠેકાણે પાડવા માટે ઝૂ અને ઍનિમલ શેલ્ટરનો સંપર્ક કર્યો જે આ પ્રાણીની સંભાળ રાખી શકે. જોકે કોઈ આ હિંસક પ્રાણીનાં કારનામાં જોઈને એને રાખવા તૈયાર ન થયું એટલે આખરે તેને માનવો પર હુમલા કરવાના ગુનાસર આ જેલમાં રાખવામાં આવી છે. તેને આજીવન કેદની સજા થઈ છે અને જેલની બહાર ખાસ એના માટે એક નાનું પીંજરું બનાવવામાં આવ્યું છે.
ADVERTISEMENT
આ પણ વાંચો : બટન દબાવતાં આપમેળે સાફ થઈ જાય એવી વૉટર બૉટલ શોધાઈ
જેલમાં કામ કરતા અને કેદીઓને મળવા આવતા પરિવારજનો આ રીંછને જોવા આવે છે અને વાતો કરે છે. જેલમાં કેદ થયા પછી કાત્યા સ્વભાવે શાંત થઈ ગઈ છે. કેદીઓના ભોજનમાંથી વધેલું કાત્યાને આપવામાં આવે છે. પંદર વર્ષ આ જેલમાં થઈ ગયાં છે અને કાત્યા વર્ષના સાતથી આઠ મહિના જ જાગતી અને ખાતી-પીતી હોય છે. બાકીના મહિનાઓમાં એ જેલના પીંજરાની અંદરના ગોખલામાં આખો દિવસ સૂતી રહે છે.
