27 April, 2025 10:52 AM IST | Mumbai | Gujarati Mid-day Correspondent
સૌરવ ગાંગુલી
પહલગામમાં થયેલા આતંકવાદી હુમલા પર ભૂતપૂર્વ ભારતીય કૅપ્ટન સૌરવ ગાંગુલીએ રોષ વ્યક્ત કરીને મોટું નિવેદન આપ્યું છે. બાવન વર્ષના ગાંગુલીએ હાલમાં મીડિયા સામે ભારત-પાકિસ્તાન વચ્ચેના ક્રિકેટ સંબંધો વિશેના પ્રશ્નોના જવાબમાં કહ્યું, ‘૧૦૦ ટકા, ભારતે આ કરવું જોઈએ (પાકિસ્તાન સાથેના ક્રિકેટ સહિતના તમામ સંબંધો તોડી નાખવા જોઈએ). કડક કાર્યવાહી થવી જોઈએ. દર વર્ષે આવી ઘટનાઓ બને છે એ મજાક નથી. આતંકવાદ સહન ન કરી શકાય.’
આતંકવાદી હુમલાની ઘટનાઓને કારણે ૨૦૧૨-’૧૩ બાદ ભારત અને પાકિસ્તાન વચ્ચે કોઈ દ્વિપક્ષીય ક્રિકેટ સિરીઝ રમાઈ નથી. ગાંગુલીએ સૂચન કર્યું છે કે ભારતે ICC અને એશિયન ટુર્નામેન્ટમાં પણ પાકિસ્તાન સાથે ક્રિકેટ ન રમવું જોઈએ.