12 November, 2026 10:10 AM IST | New Zealand | Gujarati Mid-day Correspondent
રોહિત શર્મા
ન્યુ ઝીલૅન્ડ અને ભારત વચ્ચેની વન-ડે સિરીઝની સતત ત્રીજી મૅચ વરસાદથી પ્રભાવિત થઈ હતી. જોકે પહેલી બે મૅચથી વિપરીત મંગળવારે રમાયેલી ત્રીજી વન-ડે મૅચમાં એક પણ બૉલની રમત રમાઈ નહોતી. હૅમિલ્ટનમાં ટૉસ જીતીને ભારતે પહેલાં બોલિંગ પસંદ કરી હતી. જોકે વરસાદ અને ભીની આઉટફીલ્ડને કારણે મૅચને નો-રિઝલ્ટ જાહેર કરવામાં આવી હતી.
ભારત આ પાંચ મૅચની સિરીઝમાં ૨-૦થી આગળ છે. કૅપ્ટન શુભમન ગિલ સહિતના ટેસ્ટ-ટીમના પ્લેયર્સ હવે ટેસ્ટ-સિરીઝની તૈયારી કરી રહ્યાં છે. વાઇસ-કૅપ્ટન શ્રેયસ ઐયરની આગેવાનીમાં ભારતની વન-ડે ટીમ અંતિમ બે મૅચ રમશે.
હૅમિલ્ટનમાં મૅચ રદ થયા પછી ન્યુ ઝીલૅન્ડના કૅપ્ટન મિચલ સૅન્ટનર અને રોહિત શર્માની વાતચીતનો વિડિયો વાઇરલ થયો હતો. આ વિડિયોમાં મિચલ સૅન્ટનર રોહિત શર્માને ‘હેલો કૅપ્ટન’ કહીને સંબોધી રહ્યો હતો. રોહિત શર્મા આ કમેન્ટ પર હસ્યો પણ હતો.
આ બન્ને પ્લેયર્સ મુંબઈ ઇન્ડિયન્સની IPL ટીમનો જ ભાગ છે. આ કમેન્ટને કારણે રોહિત શર્મા ફરી એક વખત મુંબઈની કમાન સંભાળશે એવી અટકળોને વેગ મળ્યો છે. થોડા દિવસ પહેલાં ટીમના ઇન્સ્ટાગ્રામ પેજની સ્ટોરીમાંથી રોહિત શર્માનો રાજાની ખુરસી પર બેઠેલો એક ફોટો અપલોડ કર્યા પછી ટૂંક સમયમાં ડિલીટ કરવામાં આવ્યો હતો.
