હરમનપ્રીત કૌર ઍન્ડ કંપનીની મ​લ્ટિ-ફૉર્મેટ ઑસ્ટ્રેલિયા ટૂર આજે T20 સિરીઝથી શરૂ થશે

ભારતીય વિમેન્સ ક્રિકેટ ટીમની મલ્ટિ-ફૉર્મેટ ઑસ્ટ્રેલિયા ટૂર આજથી શરૂ થઈ રહી છે. સિડની ક્રિકેટ ગ્રાઉન્ડથી આજથી ૩ T20 મૅચની સિરીઝ શરૂ થશે. ૨૪ ફેબ્રુઆરીથી ૧ માર્ચ વચ્ચે ૩ વન-ડે મૅચની સિરીઝ રમાશે, જ્યારે ૬થી ૯ માર્ચ દરમ્યાન એકમાત્ર ટેસ્ટ-મૅચ રમાશે. હરમનપ્રીત કૌર ઍન્ડ કંપની વન-ડે વર્લ્ડ કપ જીત્યા બાદ પ્રથમ વિદેશી ટૂર પર છે. 

ICC T20 રૅન્કિંગમાં ઑસ્ટ્રેલિયા વિમેન્સ ટીમ પહેલા ક્રમે અને ભારત ત્રીજા ક્રમે છે. બન્ને ટીમ આગામી T20 વર્લ્ડ કપની તૈયારી આ સિરીઝથી શરૂ કરશે. નવી મ​લ્ટિ-ફૉર્મેટ કૅપ્ટન સોફી મૉલિનેક્સ ભારત સામેની T20 સિરીઝ દરમ્યાન પ્રથમ વખત ઑસ્ટ્રેલિયાનું નેતૃત્વ કરશે. સિરીઝની શરૂઆતમાં ભારતીય ટીમે ગવર્નર-જનરલ ઇલેવન સામેની પ્રૅક્ટિસ T20 મૅચમાં ૧૨૧ રનનો ટાર્ગેટ ચેઝ કરીને પાંચ વિકેટે વિજય મેળવ્યો હતો. 

મૅચનો સમય : બપોરે ૧.૪૫ વાગ્યાથી

T20 હેડ ટુ હેડ રેકૉર્ડમાં ઑસ્ટ્રેલિયાનો દબદબો 

બન્ને ટીમ વચ્ચે ૨૦૦૮થી ૨૦૨૪ દરમ્યાન ૩૫ T20 મૅચ રમાઈ છે. એમાંથી ઑસ્ટ્રેલિયાએ ૨૬ અને ભારતે માત્ર ૮ મૅચ જીતી છે, જ્યારે એક મૅચ નો-રિઝલ્ટ રહી હતી. છેલ્લી ૧૦ ટક્કરમાં ઑસ્ટ્રેલિયા ભારત સામે ૮ મૅચ જીત્યું છે. ઑસ્ટ્રેલિયામાં ભારતીય ટીમ ત્રીજી વખત T20 સિરીઝ રમવા ઊતરશે. ભારતે આ હરીફ સામે પાંચમાંથી એકમાત્ર સિરીઝ ઑસ્ટ્રેલિયામાં ૨૦૧૬માં જીતી હતી. ઑસ્ટ્રેલિયામાં ભારતની મહિલા ટીમ છેલ્લે સિડનીમાં જ ફેબ્રુઆરી ૨૦૨૦માં T20 મૅચ જીતી હતી.